अहमदपूर (जि. लातूर) : अवैध व्यवसायांना आळा घालण्यासाठी नांदेड परिक्षेत्रातील विशेष पथकाने अहमदपूर येथे मोठी कारवाई करत जुगार अड्ड्यावर छापा टाकला. या कारवाईत 9 जणांना ताब्यात घेण्यात आले असून, सुमारे 3.45 लाख रुपयांचा मुद्देमाल जप्त करण्यात आला आहे.
पोलीस उप महानिरीक्षक कार्यालयाच्या विशेष पथकास अहमदपूर तालुक्यातील मौजे काजळ हिप्परगा येथील ‘विसावा बार’च्या दुसऱ्या मजल्यावर जुगार सुरू असल्याची गोपनीय माहिती मिळाली होती. या माहितीच्या आधारे 8 मे 2026 रोजी पथकाने धाड टाकली असता, संबंधित ठिकाणी ‘तिर्रट’ नावाचा जुगार खेळताना 9 जण आढळून आले.
कारवाईदरम्यान आरोपींकडून 58,500 रुपयांची रोकड, 77,000 रुपयांचे 9 मोबाईल फोन आणि 2,10,000 रुपयांच्या 4 दुचाकी असा एकूण 3,45,500 रुपयांचा मुद्देमाल जप्त करण्यात आला. याप्रकरणी अहमदपूर पोलीस ठाण्यात गुन्हा क्रमांक 280/2026 अन्वये महाराष्ट्र जुगार कायद्यातील कलम 4 व 5 अंतर्गत गुन्हा नोंदविण्यात आला आहे.
सदर प्रकरणाचा पुढील तपास पोलीस उपनिरीक्षक प्रकाश चिमनदरे यांच्याकडे सोपविण्यात आला आहे.
या कारवाईत पोलीस उपनिरीक्षक पंकज इंगळे यांच्यासह पोलीस हवालदार प्रदीप खानसोळे, संजीव जिंकलवाड, पोलीस कॉन्स्टेबल गणेश धुमाळ व कामाजी गवळी यांनी सहभाग घेतला. या उल्लेखनीय कामगिरीबद्दल पोलीस उप महानिरीक्षक शहाजी उमाप यांनी पथकातील अधिकारी व अंमलदारांचे अभिनंदन करून त्यांना प्रोत्साहन दिले आहे.
‘खबर’ हेल्पलाइनद्वारे माहिती देण्याचे आवाहन
नांदेड परिक्षेत्रात सुरू असलेल्या अवैध व्यवसायांवर नियंत्रण मिळवण्यासाठी पोलीस उप महानिरीक्षक कार्यालयाने ‘खबर’ नावाची हेल्पलाइन सुरू केली आहे. नागरिकांनी आपल्या परिसरातील अवैध व्यवसायांबाबत माहिती 9150100100 या मोबाईल क्रमांकावर फोन किंवा व्हॉट्सअॅपद्वारे द्यावी, असे आवाहन पोलीस उप महानिरीक्षक शहाजी उमाप यांनी केले.
