ब्रह्मपुरी तालुका | प्रतिनिधी – सुहास हजारे
ब्रह्मपुरी तालुक्यातील नामांकित व सेवाभावी म्हणून ओळखल्या जाणाऱ्या ख्रिस्तानंद हॉस्पिटलवर आरोग्य प्रशासनाने मोठी कारवाई करत रुग्णालयाचे ऑपरेशन थिएटर व संबंधित महत्त्वाचे विभाग सील केले आहेत. मोतीबिंदू शस्त्रक्रियेनंतर काही रुग्णांना जंतुसंसर्ग होऊन दृष्टी गमवावी लागल्याच्या गंभीर तक्रारीनंतर ही कारवाई करण्यात आली.
मिळालेल्या माहितीनुसार, कमी दरात उपचार उपलब्ध असल्याने या रुग्णालयात मोठ्या प्रमाणात रुग्णांची वर्दळ असते. मात्र, मागील काही दिवसांत येथे करण्यात आलेल्या मोतीबिंदू शस्त्रक्रियेनंतर जंतुसंसर्ग झाल्यामुळे तब्बल तीन रुग्णांनी दृष्टी गमावल्याची तक्रार जिल्हा शल्य चिकित्सकांकडे दाखल झाली होती.
या प्रकरणाची गंभीर दखल घेत जिल्हा शल्य चिकित्सकांनी तातडीने विशेष चौकशी समिती नेमली. समितीच्या प्राथमिक पाहणीत रुग्णालयात मोठ्या प्रमाणावर अनियमितता आढळून आल्या. तसेच, बॉम्बे नर्सिंग होम अॅक्ट, 1949 अंतर्गत असलेल्या नियमांचे गंभीर उल्लंघन झाल्याचे स्पष्ट झाले.
त्याअनुषंगाने रुग्णालयाची नोंदणी (क्र. 108) पुढील आदेशापर्यंत तत्काळ रद्द करण्यात आली असून ऑपरेशन थिएटरसह संबंधित विभागांना सील करण्यात आले आहे. तसेच रुग्णालय प्रशासनाला सविस्तर अहवाल सादर करण्याचे निर्देश देण्यात आले आहेत. ही नोटीस रुग्णालयाचे प्रशासक फादर शिजो जॉर्ज पनायेलील यांना देण्यात आली आहे.
प्राथमिक चौकशीत रुग्णालयात स्वतंत्र नेत्ररोग खाटा मंजूर नसतानाही अवैधरित्या नेत्र शस्त्रक्रिया करण्यात येत असल्याचेही उघड झाले आहे, जे नियमबाह्य आहे.
या कारवाईमुळे संपूर्ण जिल्ह्यातील वैद्यकीय क्षेत्रात खळबळ उडाली असून पुढील सविस्तर चौकशी अहवालाकडे सर्वांचे लक्ष लागले आहे
चौकशी सुरूच
या प्रकरणाच्या सखोल चौकशीसाठी विशेष पथक गठीत करण्यात आले असून प्राथमिक तपासात आढळलेल्या गंभीर अनियमिततेमुळे ऑपरेशन थिएटर सील करण्यात आले आहे. संपूर्ण अहवाल प्राप्त होईपर्यंत ही कारवाई कायम राहणार आहे. मात्र बाह्यरुग्ण विभाग सुरू राहणार असल्याची माहिती देण्यात आली आहे.
— जिल्हा शल्य चिकित्सक डॉ. महादेव चिंचोळे
कमी पैशात दवाखाना होतो हा फक्त गैरसमज आहे, सविस्तर चौकशी केल्यास आढळून येईल की किती पैसे लुटतात, ख्रिस्तानंद रुग्णालय मध्ये स्टींग ऑपरेशन करून बघाव कुणी ईमानदार पत्रकाराने. अशा लोकांची पोल खोलणे गरजेचे आहे.