अहेरी: महावितरणकडून आकारण्यात येणारी अवाजवी वीज बिले, दुष्काळसदृश परिस्थितीत शेतकऱ्यांकडून वीज बिल वसुलीसाठी होणारी सक्ती आणि दुर्गम भागातील वीजपुरवठ्याच्या समस्यांकडे लक्ष वेधण्यासाठी सोमवार, २ नोव्हेंबर रोजी आलापल्ली येथे विराट मोर्चाचे आयोजन करण्यात आले आहे.
आदिवासी विद्यार्थी एकता युवा मंच, आलापल्ली यांच्या वतीने या मोर्चाचे आयोजन करण्यात आले असून, मंचाचे आयोजक कैलास गणपत कोरेत यांनी यासंदर्भात अहेरी पोलीस ठाण्याच्या पोलीस निरीक्षकांकडे लेखी निवेदन देऊन मोर्चासाठी परवानगी मागितली आहे.सोमवारी दुपारी १२.१२ वाजता तालुका क्रीडा संकुलाच्या पटांगणातून मोर्चाला सुरुवात होणार आहे. वीर बाबुराव शेडमाके चौक मार्गे महावितरण कंपनीच्या आलापल्ली कार्यालयावर मोर्चा धडकणार असून, तेथे निवेदन सादर करून मोर्चाची सांगता करण्यात येणार आहे.
या मोर्चाच्या माध्यमातून सर्वसामान्य वीज ग्राहकांची अवाजवी वीज बिले कमी करावीत, दुष्काळसदृश परिस्थिती लक्षात घेऊन शेतकऱ्यांना वीज बिल भरण्यासाठी सक्ती करू नये, महावितरण कर्मचाऱ्यांना नियमानुसार बोनस द्यावा, तसेच अतिदुर्गम भागातील वीज ग्राहकांच्या विविध समस्या सोडवून वीजपुरवठा सुरळीत करण्यासाठी आवश्यक उपाययोजना कराव्यात, अशा प्रमुख मागण्या करण्यात येणार आहेत.
याशिवाय जनहिताच्या प्रलंबित प्रश्नांवर संबंधित अधिकाऱ्यांनी सकारात्मक निर्णय घ्यावा, अशीही मागणी आयोजकांनी केली आहे. त्यामुळे या मोर्चाकडे परिसरातील वीज ग्राहक आणि शेतकऱ्यांचे लक्ष लागले आहे.
