प्रतिबंधित एचटीबीटी कापूस बियाण्यांची तस्करी उघड

गोंडपिंपरी : ( सुरज माडूरवार ) शासनाने प्रतिबंधित केलेल्या एचटीबीटी कापूस बियाण्यांची वाहतूक करणाऱ्या दोघांना पोलिस व कृषी विभागाच्या संयुक्त कारवाईत पकडण्यात आले. या कारवाईत ६० हजार रुपयांचे प्रतिबंधित बियाणे तसेच ५० हजार रुपयांची दुचाकी असा एकूण १ लाख १० हजार रुपयांचा मुद्देमाल दि.१२ मंगळवारी सायंकाळच्या दरम्यान जप्त करण्यात आला.
पोलिसांना सोमवारी (दि.१२) गोपनीय माहिती मिळाली होती की, वडोली ते विठ्ठलवाडा मार्गावरून होंडा शाईन दुचाकीने प्रतिबंधित एचटीबीटी कापूस बियाण्यांची वाहतूक होणार आहे. माहितीच्या आधारे ठाणेदार रमेश हत्तीगोटे,तालुका कृषी अधिकारी सचिन पानसरे, जी. बी. पाटील, पोलिस कर्मचारी व पंच यांच्या पथकाने वढोली-विठ्ठलवाडा मार्गावर सापळा रचून नाकाबंदी केली.
दरम्यान, संशयित दुचाकी अडवून तपासणी केली असता, राजेंद्र खुशाबराव ठेंगणे (वय ४०, रा. नांदगाव, ता. गोंडपिंपरी) व प्रकाश यादव ताजने (वय ५१, ता. राजुरा, जि. चंद्रपूर) यांच्या ताब्यातील प्लास्टिक बोरीमध्ये प्रतिबंधित एचटीबीटी कॉटन सीडचे प्रत्येकी ४५० ग्रॅम वजनाचे ६० पॅकेट आढळून आले. प्रत्येक पॅकेटची किंमत एक हजार रुपये असल्याचे सांगण्यात आले.
यावेळी एमएच ३४ सीई ११९५ क्रमांकाची होंडा शाईन दुचाकीही जप्त करण्यात आली. ही कारवाई पोलिस व कृषी विभागाने संयुक्तपणे केली असून पुढील तपास सुरू आहे.