मूल : नवरात्रोत्सवाचा उत्साह द्विगुणित करणाऱ्या ‘भाऊंचा गरबा महोत्सव २०२६’मध्ये १८ ऑक्टोबर रोजी अभिनेत्री प्रार्थना बेहरे आणि आमदार सुधीर मुनगंटीवार यांची विशेष उपस्थिती लाभणार आहे. स्व. चांगुणाबाई सच्चिदानंद मुनगंटीवार सेवा समिती, मूल यांच्या वतीने ११ ते २० ऑक्टोबरदरम्यान तालुका क्रीडा संकुल, मूल येथे या महोत्सवाचे आयोजन करण्यात आले असून गरबा प्रेमींचा उत्स्फूर्त प्रतिसाद मिळत आहे.
‘पवित्र रिश्ता’, ‘माझी तुझी रेशीमगाठ’ या मालिकांसह ‘मितवा’ चित्रपटातून लोकप्रिय झालेल्या अभिनेत्री प्रार्थना बेहरे यांच्या उपस्थितीमुळे १८ ऑक्टोबरच्या कार्यक्रमाची रंगत वाढणार आहे. माजी वित्त, वने व सांस्कृतिक कार्यमंत्री तथा आमदार सुधीर मुनगंटीवार यांचीही यावेळी विशेष उपस्थिती राहणार आहे.
महोत्सवात खुल्या गटातील गरबा स्पर्धा, मूल शहर व तालुक्यासाठी स्वतंत्र स्पर्धा, सोलो व कपल गरबा स्पर्धा तसेच रील्स स्पर्धेचे आयोजन करण्यात आले आहे. विविध स्पर्धांतील विजेत्यांना लाखो रुपयांची बक्षिसे, तर दररोज सहभागींसाठी आकर्षक बक्षिसे व भेटवस्तू देण्यात येत आहेत.
मूल शहर व तालुक्यासह परिसरातील गरबा प्रेमींनी मोठ्या संख्येने सहभागी होऊन महोत्सवाचा आनंद घ्यावा, असे आवाहन आयोजक स्व. चांगुणाबाई सच्चिदानंद मुनगंटीवार सेवा समिती, मूल यांच्या वतीने करण्यात आले आहे.
