वरोरा : शहरातील मालवीय वॉर्ड येथील 26 वर्षीय तरुणाने रेल्वेखाली येत आत्महत्या केल्याची हृदयद्रावक घटना आज सकाळी घडली. अचानक घडलेल्या या प्रकारामुळे वरोरा शहरात शोककळा पसरली असून तरुणाच्या मृत्यूने परिसरात हळहळ व्यक्त होत आहे.
मृत तरुणाचे नाव क्रिष्णा मुरली यादव (वय 26, रा. मालवीय वॉर्ड, वरोरा) असे आहे. आज सकाळी सुमारे 11.50 वाजताच्या सुमारास आनंदवनकडे जाणाऱ्या रेल्वे मार्गावरील बोगद्याजवळ त्यांनी धावत्या रेल्वेसमोर झेप घेत आपले जीवन संपविले. घटनेमागील नेमके कारण अद्याप अस्पष्ट असून पोलिसांकडून तपास सुरू आहे.
घटनेची माहिती मिळताच रेल्वे पोलीस व स्थानिक पोलीस तात्काळ घटनास्थळी दाखल झाले. पंचनामा करून मृतदेह ताब्यात घेतला असून पुढील वैद्यकीय तपासणीसाठी उपजिल्हा रुग्णालय, वरोरा येथे शवविच्छेदनासाठी पाठविण्यात आले.
दरम्यान, संबंधित तरुण नागपूर येथे नोकरी करत असल्याची प्राथमिक माहिती पुढे आली आहे. त्याच्या अचानक जाण्याने कुटुंबीयांवर दु:खाचा डोंगर कोसळला असून परिसरात शोक व्यक्त केला जात आहे.
या घटनेमुळे तरुणांमध्ये वाढत्या मानसिक तणावाच्या प्रश्नाकडे पुन्हा एकदा लक्ष वेधले गेले आहे.
