गोंडपिपरी : ( सुरज माडूरवार)
घरकुल योजनेसाठी रेती वाहतूक करताना भरधाव ट्रॅक्टर पलटल्याने एका युवकाचा जागीच मृत्यू झाल्याची दुर्दैवी घटना बुधवारी (दि.२५) फुरडीहेटी–वढोली मार्गावर घडली. या अपघातात आणखी एक युवक जखमी झाला असून चालकाला पोलिसांनी ताब्यात घेतले आहे.
मिळालेल्या माहितीनुसार, कुलथा घाटावरून चेक बोरगाव येथील घरकुल लाभार्थ्यासाठी रेती विना नंबर ट्रॅक्टरने नेण्यात येत होती.दरम्यान फुरडीहेटी–वढोली मार्गावर ट्रॅक्टर भरधाव वेगात असल्याने चालकाचे नियंत्रण सुटले आणि ट्रॅक्टर रस्त्याखाली पलटली. त्यावेळी ट्रॉलीवर संतोष सुंदरशहा मडावी (वय २४) व साहिल कोवे हे दोघे बसले होते.
अपघात इतका भीषण होता की संतोष मडावी याचा जागीच मृत्यू झाला, तर साहिल कोवे हा जखमी झाला. घटनेची माहिती मिळताच गोंडपिपरी पोलिस ठाण्याचे ठाणेदार रमेश हत्ती गोटे व पोलिस पथक तातडीने घटनास्थळी पोहोचले. त्यांनी मृतदेह ताब्यात घेऊन उत्तरीय तपासणीसाठी पाठवला.
या प्रकरणी ट्रॅक्टर चालक आकाश गोरकर याला पोलिसांनी ताब्यात घेतले असून पुढील तपास गोंडपिपरी पोलिस करीत आहेत.
मृतक संतोष सुंदरशहा मडावी हा तरुण असून त्याच्या पश्चात आई-वडील व 5 भाऊ असा परिवार आहे. कुटुंबातील आधारवड असलेल्या तरुणाचा अकाली मृत्यू झाल्याने परिसरात हळहळ व्यक्त केली जात आहे.
