मुंबई :– महाराष्ट्रात एनडीएला (The NDA in Maharashtra) 2014 आणि 2019 मध्ये निवडणूक जितकी सोपी गेली तितकी सोपी नसेल. त्यांनी 48 पैकी 41 लोकसभेच्या जागा जिंकल्या होत्या. मात्र, आता उद्धव ठाकरे (Uddhav Thackeray) आणि शरद पवारांच्या (Sharad Pawar) बाजूने सहानुभूतीची लाट असल्याचे अजित पवार गटाचे नेते मंत्री छगन भुजबळ यांनी म्हटले आहे. भुजबळ यांनी एनडीटीव्हीला दिलेल्या मुलाखतीमध्ये 400 पारचा नाऱ्याने सुद्धा अडचण झाल्याचे म्हटले आहे.
शनिवारी एनडीटीव्हीला दिलेल्या विशेष मुलाखतीत भुजबळ यांनी नाशिक लोकसभा मतदारसंघातून माघार घेण्याच्या त्यांच्या निर्णयावरही खुलासा केला. त्यांनी एनडीएचा 400 जागा जिंकण्याचा नाऱ्यावरही भाष्य केले. ‘अब की बार 400 पार’ घोषणेमुळे घटनेमध्ये बदल केला जाणार असल्याचा मत मतदारांमध्ये झाल्याचेही भुजबळ यांनी म्हटले आहे. 2022 मध्ये एकनाथ शिंदे यांनी समर्थक आमदारांसह बंड केले होते. त्यानंतर उद्धव ठाकरे यांच्या नेतृत्वाखालील महाविकास आघाडी सरकार कोसळले होते. यानंतर एक वर्षानंतर शरद पवार यांच्या नेतृत्वाखालील राष्ट्रवादी काँग्रेसमध्ये असाच प्रकार घडला. अजित पवार यांनी पक्ष फोडला आणि भाजपशी हातमिळवणी केली आणि उपमुख्यमंत्री झाले. त्यामुळे दोन पक्ष दोन वर्षात फुटले आहेत.
अजित पवारांसोबत राष्ट्रवादी काँग्रेसमध्ये बंडखोरी करण्यात आघाडीवर असलेल्या भुजबळांना लोकसभा निवडणुकीत याचा काय परिणाम होईल? असा प्रश्न विचारला असता ते हिंदीत म्हणाले की, “मला विश्वास आहे की उद्धव ठाकरेंच्या शिवसेनेसाठी सहानुभूतीची लाट आहे. शरद पवार यांनाही सहानुभूती आहे, त्यामुळे मागील दोन निवडणुकीत ज्यापद्धतीने त्यांनी कामगिरी केली त्यापद्धतीने कामगिरी करण्यात मागे पडतील, असे वाटत नसल्याचेही त्यांनी नमूद केले. त्यावेळी दोन्ही लोकसभा निवडणुकांमध्ये भाजपने अविभाजित शिवसेनेसोबत युती करून लढले होते आणि पक्षांनी अनुक्रमे 23 आणि 18 मतदारसंघात विजय मिळवला होता. “लोकांचा विश्वास अजूनही नरेंद्र मोदींवर आहे आणि त्यांनी एक मजबूत सरकार बनवावे अशी त्यांची इच्छा असल्याचेही भुजबळ म्हणाले.
#सह्याद्रीचा राखणदार
