उमरखेड प्रतिनिधी : महागांव तालुक्यातील देशात वाढलेली इंधन दरवाढ आणि पेट्रोल-डिझेलच्या तुटवड्यामुळे सर्वसामान्य जनता त्रस्त झाली आहे. या परिस्थितीचा निषेध करण्यासाठी उमरखेड विधानसभा युवक काँग्रेसने आज २५ मे २०२६ रोजी काळी-टेंभी येथील गायकवाड पेट्रोल पंपावर अत्यंत अनोख्या पद्धतीने आंदोलन केले.
यवतमाळ जिल्हा काँग्रेस कमिटीचे अध्यक्ष मा. श्री. सचिन भैय्या नाईक यांच्या खंबीर नेतृत्वाखाली हे आंदोलन पार पडले. यावेळी युवक काँग्रेसच्या कार्यकर्त्यांनी निषेध व्यक्त करण्यासाठी वाहनधारकांना आणि नागरिकांना ‘मेलोडी’ चॉकलेटचे वाटप केले.
’गोड’ आश्वासनांची आठवण
या आंदोलनामागचा मुख्य उद्देश केंद्र सरकारच्या धोरणांवर प्रहार करणे हा होता. कार्यकर्त्यांनी आरोप केला की, “सरकारने जनतेला निवडून येण्यापूर्वी केवळ ‘गोड गोड’ आश्वासने दिली, मात्र प्रत्यक्षात महागाई वाढवून आणि इंधनाचा तुटवडा निर्माण करून सर्वसामान्यांच्या खिशाला कात्री लावली आहे.” ही ‘गोड’ आश्वासने लोकांच्या लक्षात राहावीत, यासाठीच हे प्रतीकात्मक चॉकलेट वाटप करण्यात आले.
आक्रमक पवित्रा
यावेळी युवक काँग्रेसच्या पदाधिकाऱ्यांनी आणि कार्यकर्त्यांनी तीव्र घोषणाबाजी करत परिसर दणाणून सोडला होता. पेट्रोल-डिझेलच्या वाढत्या किमती आणि प्रशासनाची अकार्यक्षमता यावर त्वरित नियंत्रण मिळवावे, अन्यथा येत्या काळात आंदोलन अधिक तीव्र करण्याचा इशारा उमरखेड विधानसभा युवक काँग्रेसने दिला आहे.
या आंदोलनामध्ये उमरखेड विधानसभा युवक काँग्रेसचे सर्व पदाधिकारी आणि कार्यकर्ते मोठ्या संख्येने उपस्थित होते.
