भामरागड येथे सर्वात दूर, सर्वात पहिले अभियानअंतर्गत एकात्मिक आदिवासी विकास प्रकल्प कार्यालयाचे भव्य जनभागीदारी शिबीर

भामरागड:-भामरागड आणि एटापल्ली तालुक्यातील आदिवासी समुदायांचा सर्वांगीण विकास साधून त्यांना मुख्य प्रवाहात आणण्याच्या उद्देशाने भामरागड तालुका मुख्यालयात आदिवासी विकास विभागामार्फत भव्य एकात्मिक आदिवासी विकास प्रकल्प कार्यालय कार्यरत आहे.तालुक्यातील आदिवासी बांधवांच्या हक्काचे आणि महत्त्वाचे कार्यालय अशी या कार्यालयाची ओळख आहे. या ठिकाणाहून आदिवासी बांधवांच्या प्राथमिक गरजा, सोय-सुविधा, शिक्षण आणि रोजगाराच्या संधी यांसारख्या विविध पैलूंवर एकत्रितपणे काम केले जात आहे.
मात्र तालुक्यातील अतिदुर्गम आणि दळणवळणाच्या सोय नसलेल्या भागांतील आदिवासी बांधवांपर्यंत विकास अद्याप पुरेसा पोहोचलेला नाही. त्यामुळे या वंचित आणि अत्यल्प लाभ घेतलेल्या आदिवासी बांधवांसाठी जनभागीदारी – सर्वात दूर, सर्वात पहिले या विशेष अभियानाचे आयोजन करण्यात आले. या अभियानांतर्गत अतिदुर्गम आणि शेवटच्या घटकांतील नागरिकांपर्यंत शासनाच्या आणि आदिवासी विकास विभागाच्या कल्याणकारी योजना थेट पोहोचविण्यासाठी हे जनभागीदारी शिबीर घेण्यात आले.या शिबिराला बिनागुंडा, पेरमिलभट्टी, तुर्रेमर्का, कुव्वाकोडी, फोदेवाडा, कुमणार आणि गुंडेनूर या गावांतील ग्रामस्थ उपस्थित होते. कार्यक्रमाचे उद्घाटन सहाय्यक प्रकल्प अधिकारी रोषना चव्हाण यांच्या हस्ते झाले. यावेळी पंचायत समिती भामरागडचे गट विकास अधिकारी महेश वाढई आणि बाल विकास अधिकारी राहुल जांभुळे हे आवर्जून उपस्थित होते.याप्रसंगी बोलताना सहाय्यक प्रकल्प अधिकारी रोषना चव्हाण म्हणाल्या,भौगोलिकदृष्ट्या अतिशय दुर्गम असलेल्या भामरागड तालुक्यातील प्रत्येक नागरिकाला त्यांच्या हक्काच्या योजनांचा लाभ मिळवून देणे हे आमचे मुख्य कर्तव्य आहे.सर्वात दूर, सर्वात पहिले या संकल्पनेचा आधार घेऊन आम्ही शेवटच्या गावांतील प्रत्येक लाभार्थीपर्यंत पोहोचत आहोत आणि जनभागीदारीतून विकास साधण्याचा प्रयत्न करत आहोत.
या विशेष शिबिरात नागरिकांना एकाच ठिकाणी विविध सेवा उपलब्ध करून देण्यात आल्या.आदिवासी विकास विभागामार्फत वैयक्तिक वनहक्क दाव्यांसाठी जवळपास 90 ते 100 प्रस्ताव तयार करण्यात आले, ज्यामुळे त्यांच्या हक्काच्या जमिनीचा प्रश्न जलदगतीने मार्गी लागण्यास मदत होणार आहे तसेच वैयक्तिक वनहक्क आणि सामूहिक वनहक्क याबत सर्व माहिती देऊन मार्गदर्शन करण्यात आले.आरोग्य विभागामार्फत मोफत आरोग्य तपासणी,औषधोपचार,आयुष्मान भारत कार्ड आणि आभा कार्ड वाटप करण्यात आले. नवीन आधार कार्ड नोंदणी तसेच जुन्या आधार कार्डमधील त्रुटी दुरुस्ती आणि अद्ययावत करणेही करण्यात आले. महिला व बालविकास विभाग आणि कृषी विभागाच्या विविध कल्याणकारी योजनांची माहिती आणि मार्गदर्शनही लाभार्थ्यांना देण्यात आले.कार्यक्रमाच्या यशस्वीतेसाठी एकात्मिक आदिवासी विकास प्रकल्प कार्यालय भामरागड येथील अधिकारी, कर्मचारी आणि विविध विभागांचे प्रतिनिधी यांनी विशेष परिश्रम घेतले.