मुंबई : प्रतिनिधी
माजी उपमुख्यमंत्री अजित पवार यांच्या निधनानंतर राष्ट्रवादी काँग्रेस पक्षाच्या नेतृत्वाबाबत मोठी घडामोड घडली आहे. रिक्त झालेल्या राष्ट्रीय अध्यक्षपदाची धुरा सुनेत्रा पवार यांच्या खांद्यावर सोपविण्यात आली असून, त्यांच्या नावाची एकमताने निवड करण्यात आली आहे.
राष्ट्रवादीचे कार्यकारी अध्यक्ष प्रफुल पटेल यांनी पक्षाच्या बैठकीनंतर नव्या राष्ट्रीय अध्यक्षांच्या नावाची अधिकृत घोषणा केली. या बैठकीस पक्षाचे वरिष्ठ नेते, पदाधिकारी व प्रतिनिधी मोठ्या संख्येने उपस्थित होते. चर्चेनंतर सर्वानुमते सुनेत्रा पवार यांच्या नावावर शिक्कामोर्तब करण्यात आले.
सूत्रांकडून मिळालेल्या माहितीनुसार, बैठकीत सुनेत्रा पवार यांच्या नेतृत्वावर पूर्ण विश्वास व्यक्त करण्यात आला. पक्षाच्या संघटनात्मक बळकटीसाठी तसेच आगामी राजकीय वाटचालीसाठी त्यांचे नेतृत्व निर्णायक ठरेल, असा विश्वास पदाधिकाऱ्यांनी व्यक्त केला.
अजित पवार यांच्या निधनानंतर निर्माण झालेली नेतृत्वाची पोकळी भरून काढत पक्षाला नव्या दिशेने नेण्याची जबाबदारी आता सुनेत्रा पवार यांच्यावर आली आहे. त्यांच्या निवडीमुळे राष्ट्रवादी काँग्रेसमध्ये नवचैतन्य निर्माण होईल, अशी अपेक्षा व्यक्त होत आहे.
