वाहून गेलेल्या बालकाचा अद्याप शोध लागला नाही; एनडीआरएफचे प्रयत्न सुरूच

पिशोर (प्रतिनिधी) जावेद शेख :
कन्नड तालुक्यातील पिशोर येथील अंजना नदीवरील आमराई रस्ता रामेश्वर वस्ती जवळील पुलावरून सोमवारी (ता.२९) दहा वर्षीय श्रावण निवृत्ती मोकासे हा मुलगा वाहून गेला होता. सलग दुसऱ्या दिवशी (ता.३०) राष्ट्रीय आपत्ती प्रतिसाद पथकाने (एनडीआरएफ) दिवसभर शोधमोहीम राबवली, मात्र उशिरापर्यंत त्याचा शोध लागला नाही.
घटनास्थळाजवळील शेताच्या कडेने जात असताना तोल जाऊन श्रावण नदीत पडला होता. घटनेनंतर स्थानिक तरुणांनी शोधमोहीम राबविली, परंतु प्रयत्न निष्फळ ठरले. सोमवारी रात्री उशिरा तहसीलदार विद्याचरण कवडकर यांनी घटनास्थळी धाव घेतली.
मंगळवारी एनडीआरएफच्या महेंद्रसिंग पुनिया यांच्या नेतृत्वाखाली १९ जणांच्या पथकाने जवळपास तीन किलोमीटरपर्यंत नदीपात्राची पाणी तपासणी करून शोध घेतला. संध्याकाळपर्यंतही मुलाचा शोध लागला नाही.
दरम्यान, उपविभागीय अधिकारी संतोष गोरड, सहाय्यक पोलीस अधीक्षक अपरिचिता अग्निहोत्री, सहाय्यक पोलीस निरीक्षक शिवाजी नागवे, तहसीलदार विद्याचरण कवडकर, आमदार संजनाताई जाधव, माजी खासदार चंद्रकांत खैरे, माजी आमदार हर्षवर्धन जाधव व उदयसिंग राजपूत राजु मोकासे कतेन काजे सुर्यभान दहेकर पि.एम डाहके  मंडळ अधिकारी ऐ.के.पट्रे ग्रामविकास अधिकारी देविदास ढेपले तलाठी कवालचंद बहुरे सातपुते यांनी घटनास्थळी भेट देऊन परिस्थितीचा आढावा घेतला.
एनडीआरएफ पथक प्रमुख पुनिया यांनी बुधवारी पुन्हा शोधमोहीम राबविणार असल्याची माहिती दिली.