गडचिरोली : जिल्ह्यात दारूबंदी असतानाही काही व्यक्ती छुप्या पद्धतीने अवैध दारूची वाहतूक आणि विक्री करीत असल्याची गुप्त माहिती मिळाल्यानंतर स्थानिक गुन्हे शाखेच्या पथकाने 01 ऑक्टोबर रोजी मोठी कारवाई केली. या कारवाईत तब्बल 730 पेट्या देशी दारूसह एक चारचाकी वाहन जप्त करण्यात आले असून एकूण 73 लाख 40 हजार रुपयांचा मुद्देमाल पोलिसांनी ताब्यात घेतला आहे.
स्थानिक गुन्हे शाखा, गडचिरोलीच्या अधिकाऱ्यांना मिळालेल्या गोपनीय माहितीनुसार अहेरी तालुक्यातील मौजा मद्दीगुडम येथे धाड टाकण्यात आली. या वेळी महिंद्रा स्कॉर्पिओ चारचाकी (क्र. MH 34 CD 8410) वाहनात अवैध देशी दारू भरून विक्रीसाठी नेण्याची तयारी सुरु असल्याचे आढळले.या कारवाईत पोलिसांनी आरोपी मिथुन विश्वास मडावी, वय 35 वर्षे, रा. आलापल्ली, ता. अहेरी, जि. गडचिरोली यास दारूसह वाहनासहित ताब्यात घेतले. तथापि, इतर तीन सहकारी मात्र पोलिसांचे अस्तित्व कळताच घटनास्थळावरून पसार झाले असून त्यांचा शोध सुरू आहे.
या कारवाईत देशी दारूचे 730 बॉक्स, किंमत अंदाजे 58,40,000 रुपयेमहिंद्रा स्कॉर्पिओ चारचाकी वाहन, किंमत अंदाजे 15,00,000 रुपये एकूण मुद्देमाल 73,40,000 रुपये इतका मुद्देमाल जप्त करण्यात आला आहे.अहेरी पोलीस ठाण्यात अप. क्र. 306/2025, कलम 65 (अ), 65 (ई), 83, 98(2), महाराष्ट्र दारूबंदी कायद्यान्वये गुन्हा दाखल झाला आहे. मुख्य आरोपी मिथुन विश्वास मडावीला अटक करण्याची प्रक्रिया सुरू असून उर्वरित फरार आरोपींचा शोध पोलिसांकडून घेतला जात आहे. पुढील तपास सपोनि. देवेंद्र पटले करीत आहेत.
सदर कारवाई पोलीस अधीक्षक नीलोत्पल यांच्या आदेशानुसार व अपर पोलीस अधीक्षक (अभियान) एम. रमेश, अपर पोलीस अधीक्षक अहेरी सत्य साई कार्तिक व अपर पोलीस अधीक्षक (प्रशासन) गोकुल राज जी. यांच्या मार्गदर्शनाखाली करण्यात आली. स्थानिक गुन्हे शाखेचे पोलीस निरीक्षक अरुण फेगडे यांच्या नेतृत्वाखाली सपोनि. भगतसिंग दुलत, पोअं/राजु पंचफुलीवार व चापोअं/दिपक लोणारे यांनी ही धडक कारवाई पार पाडली.
