वैजापूर (अर्जुन शिंदे ) │ कोरडगाव येथील ४९ वर्षीय महिलेने शिऊर पोलीस ठाण्यात आपल्या पतीविरुद्ध तक्रार दाखल केली आहे. नातवंड खेळविण्याच्या वयात पतीने एका युवतीसोबत विवाह केल्याचे समोर आले असून, या प्रकरणी २० मार्च रोजी गुन्हा दाखल करण्यात आला.
तक्रारदार महिला पुष्पा राजाराम बागुल (रा. कोरडगाव, ता. वैजापूर, ह.मु. राणा प्रताप चौक, न्यू सिडको, नाशिक) यांनी पोलिसांकडे दिलेल्या माहितीनुसार, त्यांचे लग्न ८ मे १९९६ रोजी राजाराम विश्वनाथ बागुल (रा. कोरडगाव, ह.मु. नाशिक) यांच्यासोबत झाले होते. लग्नाच्या सुरुवातीला संसार सुरळीत सुरू होता, मात्र नंतर पतीकडून माहेराहून पैसे आणण्याची मागणी, शिवीगाळ आणि मारहाणीचा प्रकार सुरू झाला.
सहा महिन्यांपूर्वी पतीने घरातून हाकलून दिल्याचा आरोप महिलेने केला आहे. काही दिवसांपूर्वी पतीने नाशिकमधील एका युवतीशी विवाह केला असल्याची माहिती मिळाल्यावर पुष्पा यांनी शिऊर पोलीस ठाण्यात तक्रार दाखल केली.
या तक्रारीवरून राजाराम बागुल यांच्याविरुद्ध गुन्हा दाखल करण्यात आला असून, पुढील तपास पोलीस अंमलदार किशोर आघाडे करीत आहेत.
