मूल : महाराष्ट्र प्रदेश काँग्रेस कमिटीचे सरचिटणीस, माजी जिल्हा परिषद अध्यक्ष तसेच चंद्रपूर जिल्हा मध्यवर्ती सहकारी बँकेचे माजी अध्यक्ष व संचालक संतोषसिंह (भाऊ) रावत यांची गोंदिया जिल्हा व विधानसभा क्षेत्राच्या प्रभारीपदी निवड करण्यात आली आहे. या निवडीबद्दल तालुका काँग्रेस कमिटी मूलतर्फे त्यांचे अभिनंदन करण्यात आले असून, पक्षाच्या वरिष्ठ नेतृत्वाचे आभार मानण्यात आले.
महाराष्ट्र काँग्रेसचे प्रभारी डॉ. सिरिवेल्ला प्रसाद यांच्या सूचनेनुसार आणि महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांच्या आदेशानुसार ही नियुक्ती करण्यात आली. रावत यांच्यावर सोपविण्यात आलेल्या नव्या जबाबदारीमुळे काँग्रेस संघटनेच्या कार्याला बळ मिळेल, असा विश्वास पक्षाच्या पदाधिकाऱ्यांनी व्यक्त केला.
या नियुक्तीबद्दल तालुका काँग्रेस कमिटी मूल, शहर काँग्रेस, युवक काँग्रेस, महिला काँग्रेस, ओबीसी विभाग तसेच विविध सेलच्या पदाधिकाऱ्यांनी डॉ. सिरिवेल्ला प्रसाद आणि हर्षवर्धन सपकाळ यांचे मनःपूर्वक आभार मानले. तसेच संतोषसिंह रावत यांना पुढील राजकीय व संघटनात्मक वाटचालीसाठी शुभेच्छा देण्यात आल्या.
