मुल प्रतिनिधी : मुल शहरात २४ ऑक्टोबर रोजी शारदा-दुर्गा देवी विसर्जन मिरवणुकीदरम्यान विविध मंडळांचे अध्यक्ष आणि डीजे चालकांवर दाखल करण्यात आलेल्या गुन्ह्यांचा पुनर्विचार करून विशेषतः महिला मंडळांच्या अध्यक्षांवरील कारवाई मागे घ्यावी, अशी मागणी भाजप महिला मोर्चाच्या जिल्हा कार्यक्रम प्रमुख प्रा. डॉ. किरण किशोर कापगते यांनी केली आहे. यासंदर्भात त्यांनी उपविभागीय पोलीस अधिकारी, मुल यांना निवेदन सादर केले.
विसर्जन मिरवणुकीदरम्यान दाखल झालेल्या गुन्ह्यांमध्ये वैशाली सचिन घोगरे, पुष्पाताई विष्णू वालकोंडे आणि नंदनी गणेश रामशेटीवार या महिला मंडळांच्या अध्यक्षांचाही समावेश आहे. धार्मिक व सांस्कृतिक परंपरा जपण्यासाठी पुढाकार घेणाऱ्या सर्वसामान्य महिलांवर गुन्हे दाखल झाल्याने त्यांच्या सामाजिक प्रतिष्ठेवर परिणाम होऊ शकतो, तसेच भविष्यात महिला सार्वजनिक उत्सवांच्या आयोजनापासून दूर राहण्याची भीती असल्याचे कापगते यांनी निवेदनात नमूद केले.
ध्वनिप्रदूषणासंदर्भातील नियमांचे पालन आवश्यक असले, तरी नियमांचे उल्लंघन आढळल्यास संबंधित मंडळांना प्रथम सूचना देऊन आवाज कमी करण्याची संधी द्यावी. त्यानंतरही नियमांचे उल्लंघन सुरू राहिल्यास नियमानुसार कारवाई करावी, अशी भूमिका त्यांनी मांडली. संबंधित मंडळांच्या अध्यक्षांवरील गुन्ह्यांचा वस्तुनिष्ठ पुनर्विचार करून कायद्याच्या चौकटीत दिलासा द्यावा आणि महिलांना धार्मिक, सामाजिक व सांस्कृतिक उपक्रमांत निर्भयपणे सहभागी होता यावे, यासाठी सकारात्मक वातावरण निर्माण करावे, अशी मागणीही त्यांनी केली.
या निवेदनाच्या प्रती मुख्यमंत्री तथा गृहमंत्री देवेंद्र फडणवीस, आमदार सुधीर मुनगंटीवार आणि चंद्रपूरचे पोलीस अधीक्षक यांनाही पाठविण्यात आल्या आहेत. शहरात सामाजिक समरसता राखून धार्मिक उत्सवांची परंपरा कायम ठेवण्याचे आवाहन महिला मोर्चाच्या वतीने करण्यात आले.
यावेळी भाजप महिला शहराध्यक्ष मनीषा गांडलेवार, माजी नगराध्यक्ष उषाताई शेंडे, नगरसेविका प्राची आक्केवार, लीणाताई बदेलवार, आयेशा शेख, सुनीता कुत्तरमारे, रजनी कवाडकर, फुलाबाई वालकोंडे, विविध शारदा मंडळांच्या अध्यक्षांसह कार्यकर्ते उपस्थित होते.
