शिरूरमध्ये मोठी आर्थिक फसवणूक; तीन जणांवर गुन्हा दाखल
शिरूर प्रतिनिधी – रमेश बनसोडे
शिरूर, पुणे (दि. 19 मार्च 2025): शिरूर पोलीस ठाण्यात मोठ्या आर्थिक फसवणुकीचा गुन्हा दाखएकाल करण्यात आला आहे. श्रीमती सविता अशोक मेसे (वय 48, व्यवसाय – टेलरिंग, रा. स्वामी छाया फेज 2, विठ्ठल नगर, शिरूर, पुणे) यांनी दिलेल्या तक्रारीनुसार, सुनिता राहुल भांगे, राहुल नवनाथ भांगे आणि ऋषी नवनाथ भांगे (सर्व रा. केसनंद रोड, वाघोली, मूळ रा. अरणगाव, ता. केज, जि. बीड) या तीन आरोपींविरुद्ध भारतीय दंड विधान कलम 420 अन्वये गुन्हा नोंदवण्यात आला आहे.
पोलिसांनी दिलेल्या माहितीनुसार, 1 ऑक्टोबर 2022 ते 18 मार्च 2025 या दरम्यान आरोपींनी फिर्यादी यांच्या घरी वारंवार भेट देऊन त्यांना ‘वाटाणा सोलणे आणि पनीर तयार करण्याचा प्लांट’ सुरू करण्याचे आमिष दाखवले. या व्यवसायात गुंतवणूक केल्यास मोठा नफा मिळेल आणि फिर्यादी यांना भागीदार म्हणून सामावून घेतले जाईल, असे खोटे आश्वासन त्यांनी दिले. आरोपींच्या या भूलथापांना बळी पडून फिर्यादी आणि त्यांच्या मैत्रिणींनी मिळून तब्बल ₹1,84,66,658/- इतकी मोठी रक्कम आरोपींना दिली. मात्र, आरोपींनी हा सर्व पैसा स्वतःच्या स्वार्थासाठी वापरला आणि फिर्यादी यांची घोर फसवणूक केली.
या फसवणुकीनंतर श्रीमती मेसे यांनी तातडीने शिरूर पोलीस ठाण्यात धाव घेऊन तक्रार दाखल केली. पोलिसांनी या प्रकरणाची गांभीर्याने दखल घेतली असून, अधिक तपास सुरू केला आहे. महिला पोलीस उपनिरीक्षक झेंडगे या प्रकरणाचा कसून तपास करत आहेत. पोलीस हवालदार वाडेकर (क्रमांक 2120) यांनी या गुन्ह्याची अधिकृत नोंद केली आहे.
शिरूर पोलिसांनी नागरिकांना आवाहन केले आहे की, कोणत्याही अनोळखी व्यक्तीच्या आमिषाला बळी पडू नये आणि मोठ्या आर्थिक गुंतवणुकीपूर्वी सखोल चौकशी करावी. अशा फसवणुकीच्या घटनांपासून सावध राहणे अत्यंत आवश्यक आहे, असे पोलिसांनी सांगितले आहे. पुढील तपासानंतर या प्रकरणातील अधिक माहिती समोर येईल.
