फ्लोरिडा │ तब्बल 9 महिन्यांनंतर भारतीय वंशाच्या अंतराळवीर सुनीता विल्यम्स आणि त्यांच्या सहकाऱ्यांची सुरक्षित पृथ्वीवर परतफेरी झाली आहे. अमेरिकेच्या फ्लोरिडा किनाऱ्यावर स्पेसएक्सच्या ड्रॅगन स्पेसक्राफ्टने यशस्वी लँडिंग (स्प्लॅशडाऊन) केले.
स्पेसएक्सचे ड्रॅगन स्पेसक्राफ्ट सोमवार-मंगळवार दरम्यान रात्री 1 वाजता आंतरराष्ट्रीय अवकाश स्थानकातून (ISS) पृथ्वीच्या दिशेने प्रवासाला निघाले. हवामान अनुकूल असल्याने भारतीय वेळेनुसार बुधवारी रात्री 3 वाजून 27 मिनिटांनी हे यान फ्लोरिडाच्या समुद्रात चार पॅराशूटच्या मदतीने उतरले.
लँडिंग झाल्यानंतर नियमानुसार स्पेसक्राफ्टचे तापमान आणि अन्य तांत्रिक तपासणी पूर्ण केल्यानंतरच अंतराळवीरांना बाहेर काढण्यात आले.
या मोहिमेत सुनीता विल्यम्स यांच्यासोबत अमेरिकन अंतराळवीर निक हेग, बुच विल्मोर आणि रशियाचे अलेक्झांडर गोर्बुनोव सहभागी होते. स्प्लॅशडाऊन साइटजवळ तैनात रिकव्हरी टीमने तत्काळ मदतीसाठी दोन स्पीड बोट पाठवल्या आणि अंतराळवीरांना सुरक्षित बाहेर काढले.
सर्वप्रथम निक हेग कॅप्सूलमधून बाहेर आले आणि त्यांनी कॅमेऱ्याच्या दिशेने आनंदाने हात हलवला. त्यानंतर सुनीता विल्यम्स बाहेर आल्या आणि त्यांनी हसत हात हलवून आपला आनंद व्यक्त केला.
स्पेसक्राफ्ट पृथ्वीच्या वातावरणात प्रवेश करत असताना त्याचे बाह्य आवरण अत्यंत गरम होते. त्यामुळे लँडिंगनंतर 10 मिनिटांपर्यंत कॅप्सूल उघडले जात नाही. तापमान सामान्य झाल्यानंतरच अंतराळवीरांना बाहेर काढण्यात आले.
सुनीता विल्यम्स आणि त्यांच्या सहकाऱ्यांची ही यशस्वी परतफेरी स्पेसएक्स आणि नासासाठी मोठा यशस्वी टप्पा मानला जात आहे. अंतराळ संशोधन क्षेत्रात या मोहिमेचे मोठे महत्त्व असून भविष्यातील अंतराळ प्रवासासाठी हा एक महत्त्वाचा अनुभव ठरेल.
