अमरावती │पोलिस दलाला कलंकित करणाऱ्या घटनांमध्ये अजून एका प्रकरणाची भर पडली आहे. नांदगाव खंडेश्वर पोलीस ठाण्याचे उपनिरीक्षक दर्शन पुंडलीक दिकोंडवार यांनी ट्रॉली सोडण्यासाठी ५ हजार रुपयांची लाच मागितल्याप्रकरणी एसीबीने त्यांना अटक केली आहे.यासोबतच लाच स्वीकारण्यास मदत करणाऱ्या सुकेश अनिल सारडा यालाही ताब्यात घेण्यात आले आहे.
अमरावती लाचलुचपत प्रतिबंधक विभागाकडे आलेल्या तक्रारीनुसार, तक्रारदाराच्या वडिलांच्या नावे असलेली ट्रॉली सोडण्यासाठी दिकोंडवार यांनी लाच मागितली होती. ही रक्कम थेट न स्वीकारता त्यांनी सुकेश सारडा याच्याकडे देण्यास सांगितले. मात्र, तक्रारदाराने याची माहिती एसीबीला दिल्याने १३ मार्च रोजी सापळा रचण्यात आला.
संशय आल्याने पीएसआयने ठरलेल्या वेळी लाच न स्वीकारता टाळाटाळ केली, मात्र लाच मागणीचा पुरावा मिळाल्याने अखेर १८ मार्च रोजी दोघांनाही अटक करण्यात आली.
पोलिसांकडून कायदा-सुव्यवस्थेची अपेक्षा असते, मात्र लाचखोरीच्या घटनांमुळे विश्वासघात होत आहे. यापूर्वीही अनेक अधिकाऱ्यांवर कारवाई झाली असतानाही भ्रष्टाचार थांबत नाही, हेच या घटनेतून दिसून येते. राज्यातील लाचखोरीच्या उच्चाटनासाठी केवळ एसीबीच्या कारवायांवर विसंबून न राहता सर्वसामान्य नागरिकांनीही जागरूक राहणे गरजेचे आहे.
