नांदेड बालाजी पाटिल :- हदगाव शहरातील स्टेट बँक ऑफ इंडिया (एसबीआय) शाखा शेतकऱ्यांसाठी विविध कर्ज योजना पुरवणारी महत्त्वाची संस्था आहे. येथे पीक कर्ज, मुद्रा लोन, गृहकर्ज यांसारख्या सुविधा उपलब्ध आहेत. परंतु शेतकऱ्यांना दलालांकडून होणाऱ्या फसवणुकीपासून वाचवण्यासाठी शाखा अधिकारी प्रकाश मेका यांनी थेट आवाहन केले आहे. त्यांनी स्पष्ट केले की, शेतकऱ्यांनी कर्ज प्रक्रियेसाठी कोणत्याही दलालांचा आधार घेऊ नये आणि बँकेशी थेट संपर्क साधावा.
शाखा व्यवस्थापक प्रकाश मेका यांनी शेतकऱ्यांना सांगितले की, शेतकऱ्यांचा आदर ही बँकेची प्राथमिकता आहे. कोणत्याही प्रकारचे कर्ज मंजूर करणे ही बँकेची जबाबदारी आहे, आणि शेतकऱ्यांनी कोणत्याही फसव्या मध्यस्थांवर अवलंबून राहू नये. फाईल प्रक्रिया, केवायसी, किंवा कोणत्याही कागदपत्रांच्या अडचणींसाठी थेट बँकेत संपर्क साधा. दलालांना पैसे देऊन कर्ज मिळवण्याचा प्रयत्न केल्यास नुकसान शेतकऱ्यांचेच होईल.
हदगाव येथील एसबीआय शाखा ही शेतकऱ्यांच्या समस्या सोडवण्यासाठी कायम तत्पर राहिली आहे. कर्ज प्रक्रिया सुलभ करण्यासाठी विशेष प्रयत्न करण्यात आले आहेत. शेतकऱ्यांनी स्वतः हजर राहून कर्ज प्रक्रियेत सहभाग घेतल्यास कोणत्याही प्रकारचे अडथळे निर्माण होणार नाहीत, असेही शाखा व्यवस्थापकांनी सांगितले.
शिंदे गटाचे गटनेते आणि विधानसभा आमदार हेमंत पाटील यांनी शेतकऱ्यांच्या हितासाठी पुढाकार घेतला आहे. त्यांनी एसबीआय शाखेच्या अधिकाऱ्यांशी थेट संवाद साधून पीक कर्जासंदर्भातील तक्रारी तातडीने सोडविण्याचे निर्देश दिले आहेत. शेतकऱ्यांच्या अडचणींना प्राधान्य देत त्यांचे प्रश्न मार्गी लावण्यासाठी त्यांनी ठाम भूमिका घेतली आहे.
एसबीआय बँकेचे फील्ड आफीसर प्रशांत कवडे यांनीही शेतकऱ्यांना महत्त्वाचा सल्ला दिला आहे. ते म्हणाले, “शेतकरी कोणत्याही प्रकारचे कर्ज, मग ते पीक कर्ज, मुद्रा लोन किंवा गृहकर्ज असो, थेट बँकेत संपर्क साधून अर्ज करावा. दलालांचा आधार घेणे पूर्णतः टाळावे. बँक शेतकऱ्यांच्या सेवेसाठी आहे, आणि कोणत्याही बाहेरील व्यक्तीच्या माध्यमातून कर्ज मंजुरीची आवश्यकता नाही.
शाखा व्यवस्थापक प्रकाश मेका आणि फिल्ड आफीसर प्रशांत कवडे यांच्या या सूचनांमुळे शेतकऱ्यांना फसवणुकीपासून बचाव करण्याची महत्त्वाची माहिती मिळाली आहे. शेतकऱ्यांनी थेट बँकेच्या अधिकृत प्रक्रियेत सहभाग घेतल्यास त्यांना वेगवान सेवा आणि योग्य मार्गदर्शन मिळू शकते.
हदगाव एसबीआय बँकेच्या या आवाहनामुळे शेतकरी वर्गाला दिलासा मिळाला असून, या उपक्रमामुळे शेतकऱ्यांच्या विश्वासाला बळकटी मिळणार आहे.
