राहुरी : राहुरी तालुक्यातील धानोरे येथील आदर्श व नवोपक्रमशील जिल्हा परिषद प्राथमिक शाळा दिघेवस्ती(धानोरे) येथे शालेय अभ्यासाबरोबरच विद्यार्थ्यांचा सर्वांगीण विकास होण्यासाठी विविध उपक्रमांचे आयोजन नियमितपणे केले जाते.
विद्यार्थ्यांना विविध लघुउद्योगांची माहिती व्हावी या उद्देशाने *लोणारी कोळसा* या लघुउद्योग क्षेत्रभेटीचे आयोजन केले होते.
मधला मळा दिघेवस्ती येथे रायगड जिल्ह्यातील आदिवासी समाजातील काही कुटुंबे कोळसा बनविण्यासाठी आलेली आहेत. वेड्या बाभळीच्या लाकडापासून कोळसा कसा बनवतात हे प्रात्यक्षिकाद्वारे व बनविलेला कोळसाही विद्यार्थ्यांना दाखविण्यात आला.
विद्यार्थ्यांनी कोळसा बनविण्यासाठी किती दिवस लागतात?, कोळसा विक्री कोठे करतात?,एक पोते कोळशाचा भाव किती?, कोळशाचा उपयोग कशासाठी करतात?, कोळसा बनविण्यासाठी किती मजुरी मिळते? कोळसा विक्रीतून किती उत्पन्न मिळते? इ.विविध प्रकारचे प्रश्न विचारून प्रत्यक्ष मुलाखतीद्वारे माहिती मिळवली.
क्षेत्रभेटीनंतर मळ्यातच डॉ.पोपटराव दिघे व रविंद्र दिघे यांनी सर्व विद्यार्थ्यांसाठी दाळ-बट्टी व लापशी अशा *स्वादिष्ट व रुचकर* स्नेहभोजनाचे आयोजन केले होते.
२०६ विद्यार्थ्यांनी स्वादिष्ट भोजनाचा यथेच्छ आस्वाद वनभोजनाचे निमित्ताने घेतला. विद्यार्थ्यांनी जेवणानंतर विविध गाणी गायन केली.
क्षेत्रभेट व वनभोजन उपक्रम यशस्वीतेसाठी शाळेचे मुख्याध्यापक श्री.प्रभाकर शिंदे, शिक्षक – श्री.राजेंद्र बोकंद, श्रीम.विद्याताई उदावंत, श्रीम.सुनिता ताजणे,श्रीम. मनिषा शिंदे, श्री.सोमनाथ अनाप व सरगम दिघे,शाळा व्यवस्थापन समिती यांच्या विशेष प्रयत्नाने क्षेत्रभेट व वनभोजनाचा उपक्रम खऱ्या अर्थाने यशस्वी झाला.
