‘त्या‘कॉंग्रेस नेत्याविरूदध कारवाई करा – मागणीचे निवेदन प्रशासनाला सादर
मूल प्रतिनिधी
व्हाईस ऑफ मिडीयाचे जिल्हाध्यक्ष आणि दै.पुण्यनगरीचे प्रतिनिधी संजय पडोळे यांना कॉंग्रेसच्या एका नेत्याने जीवे मारण्याची आणि परिवाराला संपविण्याची धमकी देण्यात आली.त्या घटनेचा व्हाईस ऑफ मीडिया,मूल तर्फ्रे निषेध करण्यात आला. याबाबत व्हाईस ऑफ मीडिया संघाची तातडीची सभा घेण्यात आली.
सभेच्या अध्यक्षस्थानी व्हाईस ऑफ मिडीयाचे जिल्हा कार्याध्यक्ष गुरुभाऊ गुरुनुले हे होते.त्यात निषेधाचा ठराव घेण्यात आला. आणि धमकी देणारे कॉंग्रेसचे नेते प्रकाश मारकवार यांच्या विरूदध कडक कारवाई करण्यात यावी अशी मागणीही करण्यात आली. या मागणीचे निवेदन मूल येथील पोलिस निरिक्षक आणि उपविभागीय अधिकारी मूल यांना देण्यात आले. पुण्यनगरी मध्ये प्रसिदध झालेल्या एका बातमीच्या संदर्भात कॉंग्रेसचे नेते प्रकाश मारकवार यांनी संजय पडोळे हे आपल्या कर्तव्यावर असताना भ्रमणध्वनी वरून जीवे मारण्याची धमकी आणि परिवाराला संपविण्याची भाषा वापरली. एखादया बातमीच्या संदर्भात वृत्तपत्राच्या बातमीदाराला धमकी देणे म्हणजे वृत्तपत्राच्या स्वातंत्र्यांची पायमल्ली करण्यासारखे आहे. प्रत्येक बातमीदाराला आपआपल्या प्रकारे लिखाणाचे स्वातंत्र्य आहे.हे स्वातंत्र्य कोणी हिरावून घेत असेल तर ते खपवून घेतले जाणार नाही.हे अशोभनीय कृत्य आहे. लोकशाहीचा चौथा स्तंभ असलेल्या वृत्तपत्राच्या प्रतिनिधींना संरक्षण मिळालेच पाहिजे, अशा आशयाचा ठराव व्हाईस ऑफ मीडियातर्फे घेण्यात आला.व्यक्ती कोणीही आणि कोणत्याही पक्षाचा का असेना त्याचा निषेध झालाच पाहिजे असे मत उपस्थित पदाधिका-यांनी आणि सदस्यांनी व्यक्त केले. या घटनेचा निषेध करून प्रकाश मारकवार यांच्या विरूदध प्रशासनाने कडक कारवाई करावी अशी मागणी यावेळी करण्यात आली.
सभेला आणि निवेदन देताना व्हाईस ऑफ मिडीया चे जिल्हा कार्याध्यक्ष गुरुभाऊ गुरुनुले, व्हाईस ऑफ मिडीया चे तालुका अध्यक्ष मंगेश पोटवार, व्हाईस ऑफ मीडिया चे तालुका कार्याध्यक्ष शशिकांत गणवीर, रोहित कामडे, गुलशन लाकडे, प्रशांत मेश्राम इत्यादी सदस्यगण उपस्थित होते.
