गडचिरोली: अत्यंत प्रतिकूल परिस्थितीवर मात करत गडचिरोली जिल्ह्यातील मुधोली चक येथील एका शेतकरी पुत्राने मोठा यश मिळवलंय. एमपीएससीमार्फत घेण्यात आलेल्या महाराष्ट्र दुय्यम सेवा अराजपत्रित गट ब परीक्षेतील पोलीस उपनिरीक्षक २०२१ परीक्षेत अनुसूचित जमाती प्रवर्गातून त्याने राज्यात द्वितीय क्रमांक मिळवला.सुरज रमेश कोडापे असे या शेतकरी पुत्राचे नाव. १० एप्रिलला निकाल जाहीर झाल्यावर गावात एकच जल्लोष करत वाजत गाजत त्याचे स्वागत करण्यात आले.
मुलगा अभ्यासात हुशार, पण आई-वडील परिस्थितीने नडलेले. दीड एकर शेतीत भागत नसल्याने मजुरी काम करून वडिलांनी घर खर्च भागविला, तर आईने हौसेला मुरड घालत दागिने मोडून शिक्षणासाठी पैसे लावले. आई वडिलांचा त्याग पाहून मुलाने चिकाटीने अभ्यास करत पोलीस उपनिरीक्षक म्हणून पांग फेडले.चामोर्शी तालुक्यातील मुधोली चक (क्र.२) येथील रमेश कोळापे यांना अवघी दीड एकर शेती. पत्नी, दोन मुली, एक मुलगा अशा पाच जणांचा कुटुंब. शेतीत भागत नसल्याने रमेश यांनी गावातील रेशन दुकानदार संपत पाटील गौरकर यांच्याकडे काम केले. त्यातून धान्याचा प्रश्न मिटायचा व चार पैसेही मिळायचे. मुलगा सुरज हा अभ्यासात हुशार त्याची प्राथमिक शिक्षण गावातील जिल्हा परिषद शाळेत झाले. पुढे चामोर्शी, भेंडाळा येथील शाळेत शिक्षण घेतले.नंतर जवाहर नवोदय विद्यालय घोट येथून बारावी पूर्ण केले.
भूगोल विषयात १०० पैकी ९९ गुण मिळविल्याने सुरजला तत्कालीन केंद्रीय मानव संसाधन विकास मंत्री स्मृती इराणी यांच्या हस्ते दिल्ली येथील विज्ञान भावनात पुरस्काराने सन्मानित केले यावेळी पंतप्रधान नरेंद्र मोदी यांनी देशातील १२० विद्यार्थ्यांची हितगुज साधले होते. यात सुरजचाही समावेश होता नंतर त्याने पुण्यातून राज्यशास्त्र विषयातून पदवी संपादन केली. नागपूर विद्यापीठातून पत्रकारितेत मास्टर पदवीही मिळविली .सुरजची मोठी बहीण प्रियंका संघदीप देवतळे ही आरोग्य सेविका असून कल्याणी रवी दुर्गे ही गृहिणी आहे त्यांचेही शिक्षणासाठी पाठबळ मिळाले. सुरजची ओढ राज्यसेवेकडे होती. पुण्यात शिकवणीसाठी पैसे नव्हते, तेव्हा आईने कर्णफुले विकले व पैशांची जुडवा जुडवा केली. पहिल्या प्रयत्नात सुरजला यश आले नाही, मात्र त्याने हार न मानता जिद्दीने अभ्यास केला.
२०२१ मध्ये उपनिरीक्षक पदाच्या ३७६ जागांसाठी जाहिरात निघाली पूर्व परीक्षा फेब्रुवारी २०२२ मध्ये झाली मुख्य परीक्षा जुलै २०२२ मध्ये पार पडली नोव्हेंबर २०२३ मध्ये शारीरिक चाचणी झाली मार्च २०२४ मध्ये मुलाखत पार पडली. मात्र न्यायालयीन प्रकरणामुळे अंतिम निकाल लागण्यासाठी बरेच दिवस प्रतीक्षा करावी लागली.अखेर १० एप्रिल रोजी गोड बातमी मिळाली. गावात प्रवेश होताच घरच्यांनी आणि मित्रमंडळींनी जल्लोषात स्वागत करत सत्कार केला.
माझ्या कुटुंबाची परिस्थिती बेताची होती, पण आई-वडिलांना शिक्षणाचे महत्त्व ठाऊक होते.शिक्षण घेऊन भविष्यात काहीतरी करावं ही जिद्द होती.मनात जिद्द असेल परिस्थितीवर मात करून यश मिळविता येते.
-सूरज कोडापे,मुधोली चक (क्र.२)