नाशिक : कर्मचारी भविष्यनिर्वाह निधीच्या (ईपीएफओ) विभागीय आयुक्तासह तीन जणांना केंद्रीय अन्वेषण विभागाच्या (सीबीआय) अधिकाऱ्यांनी दोन लाखांची लाच स्वीकारताना अटक केल्याने खळबळ उडाली आहे.
कर्मचारी भविष्यनिर्वाह निधीचे विभागीय आयुक्त (ग्रेड २) गणेश आरोटे, अंमलबजावणी अधिकारी अजय आहुजा, ईपीएफओ एजंट बी. एस. मंगलकर अशी अटक करण्यात आलेल्या तिघांची नावे आहेत. सीबीआयच्या लाचलुचपत प्रतिबंधक विभागाने पत्रकाद्वारे ही माहिती दिली. नाशिकमध्ये कार्यालय सुरू केल्यानंतर सीबीआयच्या लाचलुचपत प्रतिबंधक विभागाची ईपीएफओवरील ही मोठी कारवाई मानली जाते. यापूर्वी काही वर्षांपूर्वीही पीएफ कार्यालयावर लाचप्रकरणी कारवाई झाली होती.
अटक करण्यात आलेल्या तिन्ही संशयितांना गुरुवारी नाशिक येथील जिल्हा न्यायालयात हजर केले असता त्यांना एक जानेवारी २०२४ पर्यंत पाच दिवसांची पोलिस कोठडी सुनावण्यात आली. ईपीएफओ अधिकारी आणि एजंट नाशिक येथील रहिवासी असून, तक्रारदाराच्या फर्मशी संबंधित पीएफ प्रकरणाचा निपटारा करण्यासाठी या अधिकाऱ्याने खासगी पीएफ एजंटमार्फत दोन लाखांची लाच मागितली व स्वीकारल्याचा आरोप आहे.
सीबीआयने नाशिक येथे सात ठिकाणी छापे टाकत रोख रक्कम, लाच प्रकरणाचा तपशील असलेली डायरी आदी साहित्य हस्तगत करण्यात आले आहे. सीबीआयने ऑगस्ट २०२२ मध्ये नाशिकच्या सिडको कार्यालयामधून जीएसटी विभागाचे अधीक्षक चंद्रकांत चव्हाणके यांना लाचप्रकरणी अटक केली होती.
–
