चंद्रपूर, दि. 29 : ‘स्वच्छता ही सेवा’ अभियानांतर्गत सफाईमित्रांच्या आरोग्याची काळजी, सुरक्षिततेला प्राधान्य आणि त्यांच्या योगदानाचा सन्मान करण्यासाठी तालुका पातळीवर ‘सफाईमित्र सुरक्षा सेवा आणि सन्मान शिबिर’ आयोजित करावे, असे आवाहन जिल्हा परिषदेचे मुख्य कार्यकारी अधिकारी पुलकित सिंह यांनी केले आहे.
सफाईमित्र हे स्वच्छ आणि निरोगी समाजाच्या निर्मितीत महत्त्वाची भूमिका बजावत आहेत. त्यांच्या कामाच्या ठिकाणी निर्माण होणारे धोके लक्षात घेता त्यांना आवश्यक सुरक्षा साधने उपलब्ध करून देणे, त्यांचा योग्य वापर करण्याबाबत मार्गदर्शन करणे तसेच नियमित आरोग्य तपासणी करणे आवश्यक आहे. या अनुषंगाने तालुकास्तरावर विशेष शिबिरांचे आयोजन करण्याच्या सूचना देण्यात आल्या आहेत.
या शिबिरामध्ये सफाईमित्रांची सर्वसाधारण आरोग्य तपासणी, आवश्यक लसीकरण, आजार प्रतिबंध व आरोग्यविषयक मार्गदर्शन करण्यात यावे. तसेच कामाच्या ठिकाणी सुरक्षिततेचे नियम, संभाव्य धोके व प्रतिबंधात्मक उपाय याबाबत मार्गदर्शन करावे. सफाईमित्रांनी काम करताना हातमोजे, मास्क, गमबूट, हेल्मेट, सुरक्षा जॅकेट यांसारख्या वैयक्तिक संरक्षणात्मक साधनांचा योग्य वापर करावा, याबाबतही शिबिरातून प्रबोधन करण्यात यावे. ‘सुरक्षित काम, सुरक्षित जीवन’ हा संदेश सफाईमित्रांपर्यंत पोहोचविण्यावर भर देण्यात येणार आहे.
उत्कृष्ट कार्य करणाऱ्या सफाईमित्रांचा सन्मान : स्वच्छता व्यवस्थेत उल्लेखनीय योगदान देणाऱ्या सफाईमित्रांच्या कार्याची दखल घेऊन त्यांचा गौरव व सन्मान करावा. सफाईमित्रांच्या योगदानाला सामाजिक प्रतिष्ठा मिळावी आणि त्यांना प्रोत्साहन मिळावे, यासाठी अशा उपक्रमांचे महत्त्व असल्याचे मुख्य कार्यकारी अधिकारी पुलकित सिंह यांनी सांगितले.
स्वच्छ भारत मिशन, जिल्हा परिषद चंद्रपूर यांच्या माध्यमातून हा उपक्रम प्रभावीपणे राबविण्यासाठी संबंधित पंचायत समित्या, ग्रामपंचायती, आरोग्य विभाग आणि स्वच्छता यंत्रणेने समन्वयाने कार्य करण्याचे आवाहन करण्यात आले आहे.
