वरोरा : विशेष अनुदान निधी 2025-26 अंतर्गत वरोरा शहरातील नागरिकांना आधुनिक व दर्जेदार सार्वजनिक सुविधा उपलब्ध करून देण्याच्या दिशेने महत्त्वाचे पाऊल उचलण्यात आले आहे. नगर परिषद वरोरा परिक्षेत्रातील मौजा खांजी, सर्व्हे क्र. 169/3 येथील विद्यानगरी हाऊसिंग सोसायटीच्या ओपन स्पेसमध्ये साकारण्यात येणाऱ्या नमो उद्यान प्रकल्पाचे भूमिपूजन आमदार करण देवतळे यांच्या हस्ते उत्साहपूर्ण वातावरणात संपन्न झाले.
शहरातील नागरिकांना स्वच्छ, सुंदर, हरित आणि आरोग्यदायी वातावरण उपलब्ध करून देण्याच्या उद्देशाने उभारण्यात येणारे हे उद्यान भविष्यात वरोरा शहराच्या विकासातील महत्त्वाचा टप्पा ठरणार आहे. लहान मुलांसाठी खेळण्याची सुविधा, युवकांसाठी व्यायामाची व्यवस्था, ज्येष्ठ नागरिकांसाठी फिरण्याचे मार्ग व विश्रांतीची ठिकाणे तसेच पर्यावरण संवर्धनाला चालना देणाऱ्या विविध सुविधांचा या उद्यानात समावेश करण्यात येणार आहे. त्यामुळे हे उद्यान केवळ विरंगुळ्याचे केंद्र न राहता सामाजिक, आरोग्यविषयक आणि पर्यावरणपूरक उपक्रमांचेही प्रभावी केंद्र म्हणून विकसित होणार आहे.
यावेळी आमदार करण देवतळे यांनी वरोरा शहराच्या सर्वांगीण विकासासाठी शासनाच्या विविध योजनांमधून निधी उपलब्ध करून नागरिकाभिमुख विकासकामांना प्राधान्य दिले जात असल्याचे सांगितले. शहरात अधिकाधिक हरित क्षेत्रांची निर्मिती, मूलभूत सुविधांचा विस्तार आणि नागरिकांचे जीवनमान उंचावण्यासाठी सातत्याने प्रयत्न सुरू राहतील, अशी ग्वाही त्यांनी दिली.
भूमिपूजन कार्यक्रमास खासदार प्रतिभा धानोरकर, नगर परिषद अध्यक्ष अर्चना ठाकरे, उपाध्यक्ष योगिता नेरकर, नगरसेविका वर्षा पिसाळ, नगरसेवक बंडु देऊळकर, नगर परिषद वरोराचे मुख्याधिकारी सिद्धार्थ मेश्राम, स्वीकृत नागसेवक शंभूनाथ वरघणे, नगरसेवक संतोष पवार,नगरसेवक अक्षय भिवदरे, सामाजिक कार्यकर्ते मंगेश पिसाळ यांच्यासह विविध क्षेत्रातील मान्यवर, पदाधिकारी आणि नागरिक मोठ्या संख्येने उपस्थित होते.
उपस्थित मान्यवरांनी ‘नमो उद्यान’ प्रकल्पामुळे शहराच्या सौंदर्यात भर पडण्याबरोबरच नागरिकांना दर्जेदार सार्वजनिक सुविधा उपलब्ध होतील, असा विश्वास व्यक्त केला. वाढत्या नागरीकरणाच्या पार्श्वभूमीवर अशा हरित प्रकल्पांची गरज अधोरेखित करत या उद्यानामुळे सर्व वयोगटातील नागरिकांना आरोग्यदायी जीवनशैलीचा लाभ मिळणार असल्याचे त्यांनी नमूद केले.
विशेष अनुदान निधीतून साकारण्यात येणाऱ्या या प्रकल्पामुळे वरोरा शहराला एक आधुनिक, आकर्षक आणि पर्यावरणपूरक विरंगुळा केंद्र मिळणार असून, शहराच्या सर्वांगीण विकासाच्या वाटचालीत हा प्रकल्प महत्त्वाचा टप्पा ठरणार असल्याची भावना यावेळी व्यक्त करण्यात आली.
