कळमगाव येथे वीज कोसळून महिला ठार; आठ महिला जखमी

धामणगाव रेल्वे | उल्हास कांबळे
चांदूर रेल्वे तालुक्यातील कळमगाव येथे शुक्रवारी सायंकाळी शेतात काम सुरू असताना अचानक वीज कोसळल्याने सुनंदा निलेश सहारे यांचा जागीच मृत्यू झाला. या दुर्घटनेत त्यांच्यासोबत काम करणाऱ्या आणखी आठ महिला जखमी झाल्या असून त्यांच्यावर ग्रामीण रुग्णालयात उपचार सुरू आहेत.
मिळालेल्या माहितीनुसार, कळमगाव येथील निकोरे यांच्या शेतामध्ये महिला शेतीची कामे करत असताना अचानक विजांचा कडकडाट सुरू झाला. त्याचवेळी वीज थेट शेतात कोसळल्याने सुनंदा निलेश सहारे यांचा घटनास्थळीच मृत्यू झाला, तर इतर आठ महिला जखमी झाल्या. घटनेनंतर परिसरात एकच खळबळ उडाली.
घटनेची माहिती मिळताच आमदार प्रतापदादा अडसड यांनी तात्काळ परिस्थितीची माहिती घेत धामणगाव रेल्वे विधानसभा निवडणूक प्रमुख रावसाहेब रोठे यांना ग्रामीण रुग्णालयात पाठविले. रावसाहेब रोठे यांनी जखमी महिलांची भेट घेऊन त्यांच्या प्रकृतीची विचारपूस केली तसेच डॉक्टरांशी चर्चा करून उपचारात कोणतीही हलगर्जी होऊ नये, अशा सूचना दिल्या.
आमदार प्रतापदादा अडसड यांनी पीडित कुटुंबीयांना शासनाकडून तातडीची आर्थिक मदत मिळवून देण्यासाठी प्रयत्न करण्यात येतील, असे आश्वासन दिले. या दुःखद प्रसंगी आपण पीडितांच्या कुटुंबीयांच्या पाठीशी ठामपणे उभे असल्याचा विश्वासही त्यांनी व्यक्त केला.
यावेळी भाजपचे शहराध्यक्ष नवीन वाधवाणी, नगर परिषद उपाध्यक्ष बच्चू वानरे, राजूचौधरी, पप्पू सोळंके, अजयहजारे यांच्यासह अनेक पदाधिकारी व कार्यकर्ते उपस्थित होते.