गोंडपिपरी:
गोंडपिपरी तालुक्यातील वढोली,करंजी,चेक पेल्लूर,वडकुली,चेक वडकुली,सिरसी देऊळवार,चेकबेरडी, बोरगाव,धानापूर,चेक बोरगाव,लिखितवाडा,खरारपेठ बारा गावात प्रस्तावित एमआयडीसी घोषणा करण्यात आली.शेतकऱ्यांना व्यक्तिगत नोटीस पाठवणे सुरू झाले असून जमीन अधिग्रहणासाठी शासनाच्या हालचाली सुरू झाल्या आहेत.शेती आमची निर्णय आमचा.मोबदला नको शेतीही देणार नाही अशी भूमिका घेत एमआयडीसीची मान्यता रद्द करण्यात यावी या मागणीला घेऊन तळपत्या उन्हात दि.(२६) बुधवारी दुपारी 3 वाजता हजारो शेतकऱ्यांच्या उपस्थितीत उपविभागीय कार्यालयावरती औद्योगिक कृती संघर्ष समितीच्या पुढाकारातून मोर्चा धडकला.
या मोर्चातून सुपीक जमीन उद्योगासाठी नव्हे शेतीसाठीच राहू द्या अशी आर्त हाक आंदोलन कर्त्यांनी दिली.प्रस्तावित एमआयडीसीमुळे परिसरातील हजारो एकर बागायती आणि सिंचनाखालील सुपीक शेती नष्ट होण्याची भीती शेतकऱ्यांनी व्यक्त केली.शेती हाच येथील शेतकरी,शेतमजूर आणि भूमिहीन कुटुंबांच्या उदरनिर्वाहाचा प्रमुख आधार असल्याने जमीन संपादित झाल्यास संपूर्ण ग्रामीण अर्थव्यवस्थाच कोलमडून पडेल अशी भावना आंदोलकांनी व्यक्त केली.प्रकल्पामुळे शेकडो कुटुंबे बेरोजगार होऊन विस्थापनाच्या संकटात सापडतील असा आरोपही करण्यात आला. पंचायत समिती ते उपविभागीय कार्यालय असा पायदळ मोर्चा निघाला औद्योगिक कृती संघर्ष समितीचे अध्यक्ष संजय वडस्कर,समितीचे उपाध्यक्ष सुरज माडुरवार,सचिव राजू झाडे यांनी उपस्थित त्यांना मार्गदर्शन केले.आंदोलनात कल्पेश खरबनकर,मारोती भोयर, हरिदास मडावी,माधव लडके, अमित भसारकर,संदेश निमगडे,शंकर पाल,अनुप चौधरी,रामराव पेनदोर यांच्यासह अनेक पदाधिकाऱ्यांसह हजारो शेतकऱ्यांची उपस्थिती होती.उपविभागीय अधिकाऱ्यांकडे निवेदन सादर केले मोर्चादरम्यान आंदोलकांनी महिन्याभरात शासनाने एमआयडीसीची मान्यता रद्द करावी अधिसूचना मागे घ्यावी या मागणीसह विविध मागण्या पुढे मांडल्या.
