पिशोर प्रतिनिधी जावेद शेख
खरीप हंगामाच्या पूर्व मशागतीची लगबग सुरू असतानाच पिशोर व परिसरात निर्माण झालेल्या डिझेल टंचाईमुळे शेतकऱ्यांचे मोठे हाल होत आहेत. डिझेल मिळत नसल्याने शेत मशागतीची कामे ठप्प झाली असून ट्रॅक्टरची चाके थांबल्याने शेतकरी चिंतेत पडले आहेत.
पिशोर येथील चौधरी पेट्रोल पंप व लोकसेवा पेट्रोल पंपावर डिझेल मिळवण्यासाठी मागील चार-पाच दिवसांपासून शेतकऱ्यांना तब्बल एक ते दीड किलोमीटरपर्यंत लांबच लांब रांगा लावाव्या लागत आहेत. डिझेल टंचाईच्या अफवेमुळे भीतीचे वातावरण निर्माण झाल्याने पहाटेपासूनच शेतकरी ट्रॅक्टर, पिकअप, जेसीबी, दुचाकी तसेच रिकामे कॅन घेऊन पेट्रोल पंपावर धाव घेत असल्याचे चित्र पाहायला मिळाले.
सध्या खरीप हंगामाच्या पूर्व मशागतीची कामे जोरात सुरू असून वखरणी, नांगरणी आणि पेरणीपूर्व तयारीची मोठी लगबग आहे. अशातच डिझेलचा तुटवडा निर्माण झाल्याने शेतकऱ्यांचे नियोजन कोलमडले आहे. तासन्तास उन्हात उभे राहूनही इंधन मिळेल की नाही, या चिंतेने शेतकरी हवालदिल झाले होते.
प्रत्येक पेट्रोल पंपावर दररोज डिझेलचा टँकर येत असला तरी वाढत्या मागणीमुळे तो अपुरा पडत असल्याचे चित्र आहे. डिझेलचा साठा संपणार असल्याच्या अफवेमुळे परिसरात घबराट पसरली आणि अनेकांनी आपली शेतीची कामे बाजूला ठेवून थेट पेट्रोल पंपाकडे धाव घेतली. रांगेत नंबर लावण्यावरून काही काळ गोंधळाचे वातावरणही निर्माण झाले होते.
अखेर पोलीस व प्रशासनाच्या मध्यस्थीने तसेच अतिरिक्त टँकर उपलब्ध झाल्याने परिस्थिती काही प्रमाणात निवळली. मात्र, पुन्हा अशी टंचाई निर्माण होऊ नये, यासाठी प्रशासनाने इंधन पुरवठा सुरळीत ठेवावा, अशी मागणी शेतकरी व सर्वसामान्य नागरिकांकडून करण्यात येत आहे.
शेतीची कामे ऐन रंगात असताना डिझेलसाठी दिवसभर रांगेत उभे राहावे लागत आहे. ट्रॅक्टर बंद असल्याने मशागतीची कामे खोळंबली आहेत. प्रशासनाने तातडीने इंधन पुरवठा सुरळीत करावा,अशी भावना शेतकरी वर्गातून व्यक्त होत आहे.
