शिरूरमध्ये भरदिवसा सशस्त्र हल्ला; तीन आरोपींविरुद्ध गुन्हा दाखल

शिरूरमध्ये भरदिवसा सशस्त्र हल्ला; तीन आरोपींविरुद्ध गुन्हा दाखल
शिरूर (पुणे): शिरूर शहरातील विशाल कृषी सेवा केंद्रात भरदिवसा सशस्त्र हल्ला झाल्याची घटना घडली. या हल्ल्यात संतोष बाळू पाचरणे (वय ४२) हे जखमी झाले असून, त्यांच्या तक्रारीवरून तीन आरोपींविरुद्ध गुन्हा दाखल करण्यात आला आहे.
घटनेचा तपशील:
संतोष पाचरणे हे विशाल कृषी सेवा केंद्रात काम करत असताना, परवेज उर्फ पाप्या पठाण, रुपेश चित्ते आणि ओंकार दत्तात्रय जाधव यांनी त्यांच्यावर हल्ला केला. ओंकार जाधवने संतोष यांना धमकी देत शिवीगाळ केली. त्यानंतर पाप्या पठाणने संतोष यांच्यावर हाताने आणि दुकानातील कात्रीने हल्ला करून त्यांना जखमी केले. रुपेश चित्ते याने हातात कोयता घेऊन दुकानासमोर दहशत निर्माण केली. यामुळे आजूबाजूच्या दुकानदारांनी आपली दुकाने बंद केली आणि रस्त्यावरील लोकही घाबरून पळून गेले. त्यानंतर या आरोपींनी संतोष यांच्या डोक्यात वार करून त्यांना अधिक जखमी केले. संतोष आणि दुकानाचे मालक शिवम शिंदे यांनी आरडाओरडा केल्याने आरोपी पळून गेले.
गुन्ह्याची नोंद:
या घटनेप्रकरणी शिरूर पोलीस ठाण्यात गुन्हा दाखल करण्यात आला आहे. आरोपींविरुद्ध भारतीय न्याय संहिता कलम ११८(१), ३५२, ३५१(२)(३)(५), भारतीय हत्यार कायदा कलम ४, २५ आणि फौजदारी सुधारणा कायदा २०१३ चे कलम ३, ७ अन्वये गुन्हा दाखल करण्यात आला आहे.
पोलिसांची कारवाई:
या प्रकरणाचा तपास सहाय्यक फौजदार साबळे करत आहेत. प्रभारी अधिकारी पोलीस निरीक्षक संदेश केंजळे यांच्या मार्गदर्शनाखाली पुढील तपास सुरू आहे.