गंगाखेड │ लिंबेवाडी गावात गुन्हेगारांसाठी आता कोणताही सुरक्षित कोपरा राहणार नाही! ‘तिसरा डोळा’ अर्थात सीसीटीव्ही कॅमेऱ्यांमुळे गावातील प्रत्येक हालचालीवर बारकाईने लक्ष ठेवले जाणार आहे. गावाच्या सुरक्षिततेसाठी पोलीस पाटील सौ. रेखा दत्तात्रय बुधवारे यांनी स्वतः पुढाकार घेत स्वखर्च आणि लोकवर्गणीच्या माध्यमातून चार सीसीटीव्ही कॅमेरे बसवले.
गावातील बाबासाहेब आंबेडकर चौक, ग्रामपंचायत, हनुमान मंदिर आणि गावाचा मुख्य रस्ता या ठिकाणी हे कॅमेरे लावण्यात आले आहेत. ही ठिकाणे गावाच्या दैनंदिन हालचालींमध्ये महत्त्वाची भूमिका बजावतात. त्यामुळे गावात होणाऱ्या चोरीच्या घटना, गैरप्रकार, संशयास्पद हालचाली आणि भविष्यातील संभाव्य गुन्हेगारीवर बारकाईने लक्ष ठेवणे शक्य होणार आहे.
गावाच्या सुरक्षिततेसाठी घेतलेल्या या मोठ्या निर्णयाचे गावकऱ्यांकडून भरभरून कौतुक होत आहे. पोलीस पाटील सौ. रेखा बुधवारे यांनी स्वतःच्या आर्थिक मदतीने आणि लोकवर्गणीच्या सहकार्याने हा उपक्रम राबवला, हे विशेष.
गावकऱ्यांनी सांगितले की, आता लिंबेवाडीतील कोणत्याही प्रकारच्या संशयास्पद हालचाली सीसीटीव्ही कॅमेऱ्यांमध्ये कैद होतील. त्यामुळे गुन्हेगारी प्रवृत्तींना गावात थारा मिळणार नाही. हा निर्णय गावाच्या विकासाचा नवा अध्याय ठरेल.
लिंबेवाडीतील हा पुढाकार इतर गावांसाठीही आदर्श ठरणार आहे. अनेक गावांमध्ये सुरक्षेची समस्या निर्माण होत असताना लिंबेवाडीने आधुनिक तंत्रज्ञानाचा वापर करून एक पाऊल पुढे टाकले आहे. गावाच्या सुरक्षेसाठी अशा उपाययोजना करण्याची गरज इतर गावांनीही समजून घेतली पाहिजे, असे स्थानिक नागरिकांचे मत आहे.
गुन्हेगारांसाठी हा उपक्रम ‘रेड सिग्नल’ ठरणार आहे. गावात चोरी, गैरप्रकार किंवा अन्य कोणताही गैरकृत्य करण्याच्या प्रयत्नांना आळा बसणार आहे. ‘तिसऱ्या डोळ्या’खाली येण्याची भीती असलेल्या गुन्हेगारी प्रवृत्ती आता गावाकडे फिरकणार नाहीत, असा विश्वास गावकऱ्यांनी व्यक्त केला आहे.
पोलीस पाटलांचा हा पुढाकार गावाच्या सुरक्षित भविष्यासाठी महत्त्वाचा टप्पा ठरणार आहे.
