कंटेनर अपघातात भीषण आग – 21 लाखांचे नुकसान

कंटेनर अपघातात भीषण आग – 21 लाखांचे नुकसान
शिरूर प्रतिनिधी – रमेश बनसोडे
शिरूर, ता. 12 मार्च 2025: मौजे करडे (ता. शिरूर, जि. पुणे) येथे एका कंटेनरला अपघात होऊन भीषण आग लागल्याची घटना घडली. या दुर्घटनेत अंदाजे 21 लाख रुपयांचे मालाचे नुकसान झाले असून, विद्युत खांब व तारांचेही 30,000 रुपयांचे नुकसान झाल्याचे समोर आले आहे.
फिर्यादी हेमंत दिलीप वानखेडे (वय 35, व्यवसाय – वायरमन, रा. बाबुराव नगर, शिरूर) यांनी शिरूर पोलीस ठाण्यात फिर्याद दाखल केली आहे
दिनांक 09 मार्च 2025 रोजी दुपारी 3:45 वाजण्याच्या सुमारास, कंटेनर क्रमांक TN-52-AA-1227 हा सेफ एक्स्प्रेस प्रा. लि. (रांजणगाव गणपती, ता. शिरूर) येथून पार्सल माल भरून कोईमतूरकडे निघाला होता. चालक कुप्पुरवामी आर. रामलिंगम (रा. ईराबडी राको गाव, ता. बोप्पीरेपटटी, जि. धर्मापुरी, तामिळनाडू) हा चौफुल्याकडे जात असताना रस्त्याच्या परिस्थितीकडे दुर्लक्ष करून भरधाव वेगाने गाडी चालवत होता.
करडे गावच्या पुढे भारत पेट्रोल पंपाजवळ कंटेनरने विद्युत खांबाला धडक दिली, त्यामुळे खांबावरील तारांचे घर्षण होऊन ठिणग्या गवतावर पडल्या. त्यामुळे गवत जळून कंटेनरमधील सांडलेल्या डिझेलने भीषण आग पेट घेतली. या आगीत संपूर्ण कंटेनर आणि त्यातील पार्सल माल जळून खाक झाला.
याप्रकरणी आरोपी कुप्पुरवामी आर. रामलिंगम याच्याविरोधात गुन्हा क्रमांक 168/2025 नुसार IPC 281, 324 (5), मोटार वाहन कायदा 184, 134, 177 अन्वये गुन्हा दाखल करण्यात आला आहे.
सहायक फौजदार बनकर करत असून, प्रभारी अधिकारी पोलीस निरीक्षक केंजळे यांच्या मार्गदर्शनाखाली तपास सुरू आहे.