शिक्षक दांपत्याचा स्तुत्य उपक्रम – अनाथालयातील मुलांसाठी ‘छावा’ चित्रपटाचे विशेष आयोजन
शिरूर, प्रतिनिधी रमेश बनसोडे: कासारी फाटा (ता. शिरूर) येथील आशीर्वाद ट्रस्ट संचलित गुरुकुल आश्रमातील विद्यार्थ्यांसाठी ‘छावा’ चित्रपटाचे विशेष आयोजन करण्यात आले. या उपक्रमाचे आयोजन उपक्रमशील शिक्षक दांपत्य राहुल चातुर आणि ललिता भुजबळ यांच्या वतीने करण्यात आले.
गुरुकुल आश्रमात ऊसतोडणी मजूर, भटके विमुक्त, वंचित, आदिवासी आणि वीटभट्टी कामगारांच्या मुलांचे संगोपन व शिक्षण दिले जाते. आश्रम संचालक शिवाजी शिंदे यांनी स्वखर्चाने हे सामाजिक कार्य हाती घेतले आहे.
सध्या संपूर्ण देशभरात ‘छावा’ चित्रपटाची जोरदार चर्चा सुरू असताना या आश्रमातील विद्यार्थ्यांनाही छत्रपती संभाजी महाराजांचे प्रेरणादायी जीवन कळावे, त्यांच्यात राष्ट्रभक्तीची भावना निर्माण व्हावी, या उद्देशाने हा चित्रपट दाखवण्यात आला.
चित्रपट पाहताना मुले पूर्णपणे एकाग्र होती आणि अखेरच्या दृश्यांमध्ये भावनावश होऊन गहिवरून गेली. हा उपक्रम त्यांच्या ज्ञान आणि मनोरंजनासाठी उपयुक्त ठरला.
आशीर्वाद ट्रस्टच्या वतीने राहुल चातुर आणि ललिता भुजबळ यांचे आभार मानण्यात आले. तसेच, गटविकास अधिकारी महेश डोके आणि गटशिक्षणाधिकारी बाळकृष्ण कळमकर यांनी या उपक्रमाबद्दल शिक्षक दांपत्याचे विशेष कौतुक केले.
हा भावस्पर्शी उपक्रम केवळ मनोरंजनापुरता मर्यादित न राहता विद्यार्थ्यांच्या राष्ट्रप्रेम आणि प्रेरणादायी विचारसरणीला चालना देणारा ठरला. असे सामाजिक उपक्रम भविष्यातही राबविण्यात यावेत, अशी अपेक्षा व्यक्त केली जात आहे.
