शिरूर प्रतिनिधी – रमेश बनसोडे
तालुक्यातील न्हावरा येथे एका महिलेचा विनयभंग केल्याच्या प्रकरणात न्यायालयाने डॉक्टरला दोषी ठरवत दोन वर्षांच्या कारावासाची आणि 30,000 रुपयांच्या दंडाची शिक्षा ठोठावली आहे.
ही घटना 9 ऑगस्ट 2020 रोजी रात्री 10 वाजता घडली. पीडित महिला उपचारासाठी डॉ. रामहरी भुजंगराव लाड यांच्या दवाखान्यात गेली असता, डॉक्टरने तिला ओपीडीमध्ये बोलावून विनयभंग केला. या प्रकरणानंतर महिलेने शिरूर पोलीस स्टेशनमध्ये तक्रार दाखल केली होती.
तक्रारीनंतर भारतीय दंड संहितेच्या कलम 354 (अ) आणि 354 अंतर्गत गुन्हा दाखल करण्यात आला. प्रकरणाचा तपास पोलीस उपनिरीक्षक एस. एन. मोटे यांनी केला व दोषारोपपत्र न्यायालयात दाखल केले. हा खटला प्रथमवर्ग न्यायदंडाधिकारी जे. ए. झारी यांच्या न्यायालयात चालला.
खटल्यादरम्यान सरकारी वकील माया शिवाजी क्षीरसागर (जाधव) यांनी प्रभावी युक्तिवाद करत आरोपीच्या विरोधात ठोस पुरावे सादर केले. उपलब्ध साक्षी-पुराव्यांच्या आधारे न्यायालयाने डॉक्टरला दोषी ठरवून दोन वर्षांची शिक्षा आणि 30,000 रुपयांचा दंड ठोठावला.
या खटल्यात पोलीस निरीक्षक संदेश केंजळे यांच्या मार्गदर्शनाखाली कोर्ट पैरवी अधिकारी तुकाराम गोरे, महिला पोलीस अंमलदार मनिषा फंड, तसेच पोलीस हवालदार बाळकृष्ण वाडेकर आणि पोलीस अंमलदार प्रकाश वाघमारे यांनी महत्त्वपूर्ण भूमिका बजावली.
