इंदापूर : पुणे-सोलापूर राष्ट्रीय महामार्गावरील इंदापूर तालुक्यातील राजवडी येथे उड्डाणपुलाजवळ साईडपट्टीच्या भरावाचे काम सुरू असताना माती-मुरुमाचा ढिगारा कोसळून भीषण दुर्घटना घडली. गुरुवारी (दि. ३० ऑक्टोबर) सकाळी सुमारे १० वाजता घडलेल्या या घटनेत एका मजुराचा मृत्यू झाला असून, एक मजूर जखमी झाला आहे.
घटनास्थळी तीन मजूर काम करीत असताना अचानक मातीचा ढिगारा कोसळला. यावेळी एका मजुराने प्रसंगावधान राखत स्वतःची सुटका केली. अन्य दोघे ढिगाऱ्याखाली अडकले. बचाव पथकाने एका मजुराला सुरक्षित बाहेर काढून उपचारासाठी इंदापूर उपजिल्हा रुग्णालयात दाखल केले. त्याची प्रकृती स्थिर असल्याची माहिती प्रशासनाने दिली. मात्र, एका मजुराचा ढिगाऱ्याखाली दबून मृत्यू झाला.
घटनेची माहिती मिळताच स्थानिक नागरिक, भारतीय राष्ट्रीय महामार्ग प्राधिकरण, पोलीस आणि महसूल विभागाच्या पथकांनी घटनास्थळी धाव घेत बचावकार्य सुरू केले.
दरम्यान, या दुर्घटनेबाबत उपमुख्यमंत्री सुनेत्रा अजित पवार यांनी दुःख व्यक्त केले असून, घटनेची सखोल चौकशी करण्याचे निर्देश प्रशासनाला दिले आहेत. महामार्गावरील बांधकामादरम्यान कामगारांच्या सुरक्षेचा प्रश्न या दुर्घटनेमुळे पुन्हा ऐरणीवर आला आहे.
