वरोरा: तालुक्यातील महालगाव (खु.) कक्ष क्रमांक २ राखीव वन क्षेत्रात वन्यप्राण्यांच्या शिकारीसाठी आलेल्या चार आरोपींना वन विभागाच्या पथकाने रंगेहाथ पकडले. ही कारवाई १३ फेब्रुवारी रोजी रात्री ९.३० वाजताच्या सुमारास करण्यात आली.
वन विभागाचे कर्मचारी गस्त घालत असताना आरोपी रुपेश धारसिंग दडमल, जयचंद सरबत मालवे, रामा संजय दडमल (सर्व राहणार हिरापूर, पो. कोसरसार, ता. वरोरा) आणि संदिप बालीकचंद्र शेरकुरे (रा. धोपटाळा, ता. कोरपना) हे संशयास्पद अवस्थेत आढळले. चौकशी दरम्यान त्यांनी वन्यप्राण्यांची शिकार करण्यासाठी आल्याची कबुली दिली.
आरोपींकडून वाघुर, लोखंडी भाला, नायलॉन दोरी, दुचाकी वाहन आणि मोबाईल जप्त करण्यात आले. त्यांच्यावर भारतीय वन्यजीव संरक्षण अधिनियम १९७२ अंतर्गत कलम ९, ३९, २(१६) व ५१ अन्वये वनगुन्हा नोंदवण्यात आला असून, त्यांना १४ फेब्रुवारी रोजी प्रथम श्रेणी न्यायालय, वरोरा येथे हजर करण्यात आले.
ही कारवाई सहाय्यक वनसंरक्षक व्हि. तरसे यांच्या मार्गदर्शनाखाली वनपरिक्षेत्र अधिकारी सतिश के. शेंडे, डि. बी. चांभारे, जे. के. लोणकर, एस. व्हि. वेदांती तसेच करकाडे, केजकर, ब्रम्हनाथ आणि वनमजूर पथकाने केली. पुढील तपास सुरू आहे.
