नागरगाव- शिरूर तालुक्यातील न्हावरे-चौफुला रस्त्यावरील अपघातांची मालिका सुरूच असून, शुक्रवारी दुपारी एकच्या सुमारास एक छोटा हत्ती पलटी झाल्याची घटना घडली. यामध्ये गाढवे अवैध रित्या घेऊन जात असता अपघात घडला.छोटा हत्ती साइड पट्टी वरून गाईच्या गोठ्यात शिरला.अगदी त्यावेळी गोठ्यात जनावरे नव्हती.म्हणून मोठा अनंर्थ टळला.पण छोटा हत्ती मध्ये असलेले गाढवा पैकी एक गाढव जागीच ठार झाले.व अनेक जखमी झाले.त्यामध्ये असलेले माणसे सुद्धा जखमी झाले.
मिळालेल्या माहितीनुसार,( एमएच १२ ८५१७) क्रमांकाचा हा छोटा हत्ती शिरूरकडून चौफुलाकडे जात असताना नागरगाव शेलार मळा येथे रस्त्यावरील खड्ड्यामुळे नियंत्रण सुटल्याने पलटी झाला. या अपघातात दस्तगीर गुलाब मदारी, अमजद आयन मदारी, दस्तगीर अफ्रदी, दस्तगीर रहीम मदारी आणि संजय माने यांच्यासह अनेक जण जखमी झाले आहेत.
स्थानिक नागरिकांनी तातडीने घटनास्थळी धावून जखमींना मदत केली. डॉक्टर संतोष शेलार यांनी पोलिसांना आणि होमगार्डला कळवले. पोलीस आणि होमगार्डच्या पथकाने घटनास्थळी पोहोचून बचावकार्य हाती घेतले. अमोल गवळी यांनी तत्काळ क्रेन बोलवून छोटा हत्ती रस्त्याच्या कडेला काढण्याचे काम केले.
या घटनेनंतर या रस्त्यावरील खड्डे आणि साईड पट्ट्यांचा अभाव याकडे लक्ष वेधले जात आहे. या रस्त्यावरील अपघातांची संख्या दिवसेंदिवस वाढत असून, प्रशासनाकडून कोणतेही ठोस उपाययोजना न केल्याबद्दल नागरिकांमध्ये असंतोष आहे.
