सेलू –
प्रातविधी साठी गेलेल्या इसमाचा बोर नदीच्या पाण्यात पडून मृत्यू झाला. ही घटना आज ता. 6 मंगळवारी सकाळी 7 वाजताच्या सुमारास उघडकीस आली. संजय बळीरामजी रघाटाटे वय 50 रा. वॉर्ड क्रमांक 5 सेलू असे मृत पावलेल्या व्यक्तीचे नाव आहे. याप्रकरणी सेलू पोलिसांनी सकाळी 8 वाजता मर्ग दाखल केला. असे पोलीस सूत्रांकडून सांगण्यात आले.
मिळालेल्या माहितीनुसार मृतक संजय हा कबाडी काम करणारा असून दारू पिण्याच्या सवयीचा होता. त्याला मिरागीचा आजारही होता. कधीकधी तो रात्रभर घरीही जात नव्हता. ता. 5 सोमवारला तो रात्री 11 वाजता प्रातविधीसाठी घराबाहेर गेला असता रात्री घरी आलाच नाही. आज सकाळी 7 वाजता मौजा घोराड रोडच्या बोर नदी पात्रात तो मृतावस्थेत पडून असल्याचे नागरिकांना दिसला. याची माहिती त्याच्या घरच्यांना दिल्यानंतर त्याच्या पत्नीने त्याला ओळखले. घटनेची माहिती पोलिसांना दिल्यानंतर सहायक फौजदार देवराव येणकर यांनी आपल्या सहकाऱ्यांना व रुग्णमित्र प्रज्वल लटारे यांना सोबत घेत घटनास्थळी जाऊन पंचनामा करून मृतदेह उत्तरीय तपासणी करिता सेलूच्या ग्रामीण रुग्णालयात पाठविला. याप्रकरणी मृतकाची पत्नी सारिका संजय रघाटाटे यांच्या फिर्यादीवरून पोलिसांनी आकस्मिक मृत्यूची नोंद घेतली आहे. अधिक तपास ठाणेदार मंगेश भोयर यांच्या मार्गदर्शनात सेलू पोलीस करीत आहे.