गोंडपिपरी-(सुरज माडुरवार) :- गोंडपिपरी तालुक्यातील कुलथा रेती साठ्यावरून महसूल प्रशासनाच्या नाकावर टिच्चून रेतीची चोरट्या मार्गाने मध्यरात्री खुलेआम वाहतूक सुरू आहे. रेतीमाफियांवर कारवाई करण्यास व रेतीचोरी रोखण्यात स्थानिक महसूल प्रशासन अपयशी ठरले असून,जिल्हाधिकाऱ्यांनीच याकडे लक्ष घालून रेतीमाफियांवर कारवाई करावी अशी मागणी नागरिकांकडून केल्या जात आहे.रात्रभर रेतीची वाहतूक सुरू असताना महसूल कर्मचारी व अधिकारी याकडे दुर्लक्ष करीत असल्यामुळे आश्‍चर्य व्यक्त केले जात आहे.
तालुक्यातील कुलथा नदीपात्रालगत असलेल्या शेतात मोठ – मोठे उंच असे रेतीचे ढिगारे असून या रेती साठ्यावरील मध्यरात्री १० ते १५ वाहनांतून बिनधास्तपणे रेतीची वढोली – पोंभूर्णा मार्गाने वाहतूक केली जात आहे. रेतीचोरीमुळे शासनाचे लाखो रुपयांचे नुकसान होत असून, ग्रामीण भागातील रस्त्यांची अवस्था दयनीय झाली आहे.रेतीची अवैध वाहतूक केली जात असताना स्थानिक महसूल प्रशासनाने याकडे दुर्लक्ष करून रेतीमाफियांना अभय देण्याचा प्रयत्न सुरू केला आहे. वाळू वाहतूक करणारी वाहने रस्त्यावरून भरधाव जात असल्यामुळे मोठी दुर्घटना होण्याची भीती आहे. रेतीमाफियांचे दलाल दिवसभर महसूल कार्यालय परिसरात फिरत असल्यामुळे नागरिकांमध्ये उलटसुलट चर्चा सुरू आहे.रात्री १२ पासून सकाळी सहापर्यंत रेतीची वाहतूक बिनधास्त सुरू असते. रेतीचोरीस आळा घालण्यात अथवा कारवाई करण्यास स्थानिक महसूल प्रशासन पूर्णपणे अपयशी ठरले असून, जिल्हाधिकाऱ्यांनी स्वत: लक्ष घालून रेतीमाफियांच्या मुसक्या आवळाव्यात अशी मागणी नागरिकांकडून केल्या जात आहे
