चंद्रपूर: कोरपना तालुक्यातील समाजसेवक डॉ.गिरीधर काळे सामाजिक प्रतिष्ठान व सेवार्थ गृप बिबीचे नामांकित पुरस्कार नुकतेच जाहीर करण्यात आले. राज्यातील सामाजिक क्षेत्रात उल्लेखनीय योगदान देणा-या कार्यकर्त्यांसाठी दिला जाणारा जीवनगौरव पुरस्कार हेमलकसा येथील जागतिक किर्तीचे समाजसेवक पद्मश्री डॉ.मंदाकिनी व डॉ.प्रकाश बाबा आमटे यांना व सेवार्थ सन्मान चंद्रपूर येथील ज्ञानार्चना संस्थेमार्फत अपंग कल्याणासाठी कार्यरत असणा-या अर्चना मानलवार यांना जाहीर करण्यात आला आहे.
बिबी येथील प्रसिद्ध समाजसेवक डॉ.गिरीधर काळे हे मानवी शरीरातील तुटलेल्या, लचकलेल्या अस्थिरुग्नांवर मागील ३५ वर्षे निशुल्क उपचार करत. आहेत. त्यांच्या सेवेच्या सन्मानार्थ दरवर्षी स्व.सदाशिवराव चटप स्मृतीप्रीत्यर्थ माजी आमदार, शेतकरी नेते ॲड.वामनराव चटप व प्राचार्य डॉ.अनिल मुसळे यांच्याकडून पुरस्कार प्रदान करण्यात येते. रोख दहा हजार रुपये, शाल, श्रीफळ, सन्मानचिन्ह, सन्मानपत्र व ग्रामगिता असे पुरस्काराचे स्वरुप आहे.
गडचिरोली जिल्ह्यातील भामरागड सारख्या अतिदुर्गम, नक्षलप्रभावित भागात डॉ.प्रकाश आमटे व डॉ.मंदाकिनी आमटे लोकबिरादरी प्रकल्पाच्या माध्यमातून आदिम माडिया-गोंड समाजासाठी आरोग्य व शिक्षणाचे काम करत आहे. मागील पाच दशकातील त्यांच्या लोकसेवेने जगात आदर्श निर्माण केला. थोर समाजसेवक कर्मयोगी बाबा आमटे व साधना आमटे यांच्या सेवेचा वारसा त्यांची तिसरी पिढी चालवत असून कल्याणकारी समाजनिर्मीतीचे आमटे कुटुंब दिपस्तंभ आहेत. चंद्रपूरच्या समाजसेविका अर्चना मानलवार स्वत: ९०% अपंग आहेत. ज्ञानार्चना संस्थेच्या माध्यमातून अपंगाचे पुनर्वसन करतात. अपंग महिला-पुरुषांना प्रशिक्षण देवून स्वावलंबी बनवण्याचे धडे देत सक्षम करण्याचे काम त्या निष्ठेने करत आहे.
यंदाचा दिव्यग्राम महोत्सव ७ नोव्हेंबरला बिबी येथे आयोजित केला असून मान्यवरांच्या हस्ते पुरस्कार प्रदान करण्यात येईल, असे गिरीधर काळे सामाजिक प्रतिष्ठानतर्फे स्वागताध्यक्ष व आयोजक संतोष उपरे, रत्नाकर चटप, अविनाश पोईनकर, ॲड.दीपक चटप, गणपत तुम्हाणे, विठ्ठल अहिरकर, संदिप पिंगे, हबीब शेख, सतिश पाचभाई, स्वप्निल झुरमुरे, राजेश खनके, प्रमोद विरुटकर, राकेश बोबडे, कार्तिक मोरे, सुरेंद्र मुसळे, शुभम डाखरे, सुरज लेडांगे, देवानंद पिंपळकर, सचिन आसूटकर, राजेंद्र सलाम, महेश नाकाडे, इराणा तुम्हाणे, विशाल अहिरकर, संतोष बावणे, अनिल हिंगाणे, आकाश चटपल्लीवार, गोपाल मडावी, आकाश उरकुडे, गणपत मडकाम, सुरज मडावी, महेश राठोड यांनी कळवले आहे.
