अहेरी:पदवीधर वेतनश्रेणी लागू करण्याबाबत जिल्हा परिषद गडचिरोलीचे मुख्य कार्यकारी अधिकारी यांनी 27 जुलै 2026 रोजी आदेश दिल्यानंतरही संबंधित विषय शिक्षकांना अद्याप त्याचा लाभ मिळालेला नसल्याचा आरोप करीत याचिकाकर्त्या शिक्षकांनी पंचायत समिती अहेरी प्रशासनाला निवेदन दिले आहे. आदेशाची तातडीने अंमलबजावणी करावी, अन्यथा उच्च न्यायालयात अवमान याचिका दाखल करण्याचा इशाराही निवेदनातून देण्यात आला आहे.
निवेदनानुसार, जिल्हा परिषद गडचिरोलीचे मुख्य कार्यकारी अधिकारी यांनी आदेश क्रमांक जि.प./शिक्षण/स्था-1(अ)/5183/2026, दि. 27 जुलै 2026 अन्वये याचिकाकर्त्या शिक्षकांना पदवीधर वेतनश्रेणी लागू करण्याचे निर्देश दिले आहेत. मात्र आदेशानंतरही संबंधित शिक्षकांना लाभ देण्यात आलेला नसून, अंमलबजावणीसाठी कोणतीही ठोस प्रशासकीय कार्यवाही झालेली दिसून येत नसल्याचा आरोप करण्यात आला आहे.
याचिकाकर्त्या शिक्षकांनी प्रशासनाकडे आदेशाची तात्काळ अंमलबजावणी करण्याची मागणी केली आहे. तसेच, अंमलबजावणी का करण्यात येत नाही याबाबत लेखी स्वरूपात कारण कळविण्याचीही मागणी निवेदनात करण्यात आली आहे.
आदेशाची अंमलबजावणी करण्यात विलंब झाल्यास न्यायालयाच्या आदेशाचा अवमान होत असल्याचे मानून संबंधित अधिकाऱ्यांविरोधात उच्च न्यायालयात अवमान याचिका दाखल करण्यात येईल, असा स्पष्ट इशारा निवेदनात देण्यात आला आहे. त्यामुळे आता पंचायत समिती प्रशासन यावर कोणती भूमिका घेते, याकडे संबंधित शिक्षकांचे लक्ष लागले आहे.
