गोंडपिपरी ( सुरज माडूरवार)
गोंडपिपरी तालुक्यातील आकसापूर तेंदू युनिटचा लिलाव सलग चार टप्प्यांनंतरही रखडल्याने परिसरातील अर्थचक्र ठप्प होण्याची भीती निर्माण झाली होती. कंत्राटदार व वनविभाग यांच्यातील तणावामुळे युनिट विक्री होत नव्हती.या पार्श्वभूमीवर सामाजिक कार्यकर्ते व मजुरांची मागणी लक्षात घेता वनविभागाने माघार घेत तब्बल ५ व्या फेरीत टेंडर मंजूर केले.त्यामुळे पाच गावातील नागरिकांना मोठा दिलासा मिळाला आहे.
यंदा २१ लाख पुड्यांसाठी केवळ ६ लाख रुपयांत टेंडर मंजूर करण्यात आले असून पूर्वी या युनिटमधून सुमारे ३५ लाख रुपयांचा महसूल मिळत होता.कमी बोलीमुळे कंत्राटदार प्रतिसाद देत नसल्याने लिलाव रखडला होता.मात्र परिस्थितीची गंभीरता ओळखून वनविभागाने तडजोडीचा मार्ग स्वीकारत अखेर,लिलाव पूर्ण केला. सदर युनिट कामठी येथील कंत्राटदार पाशा इंटरप्रायजेस यांनी घेतले आहे.
‘हिरव सोन’ म्हणून ओळखल्या जाणाऱ्या तेंदूपान संकलनावर आकसापूर,करंजी, बेरडी,धानापूर व चीवंडा या पाच गावांतील हजारो कुटुंबांचा उदरनिर्वाह अवलंबून आहे.मे महिन्यात जोमात सुरू होणारे संकलन यंदा टेंडरअभावी संकटात सापडले होते. मात्र आता लिलाव पूर्ण झाल्याने मजुरांमध्ये समाधानाचे वातावरण निर्माण झाले आहे. विशेष म्हणजे प्रति पुडा मजुरीत ५० रुपयांची वाढ करण्यात आली असून आता मजुरांना ३५० रुपये मिळणार आहेत.
यामुळे ५व्या फेरीत झालेला लिलाव, २१ लाख पुड्यांसाठी मंजूर झालेली केवळ ६ लाखांची बोली, पूर्वी मिळणारा सुमारे ३५ लाखांचा महसूल, वाढलेली मजुरी आणि पाच गावांतील हजारो मजुरांना मिळणारा रोजगार या सर्व बाबींमुळे आकसापूर युनिट पुन्हा गतीमान झाले असून स्थानिक अर्थव्यवस्थेला मोठा दिलासा मिळाला आहे.
गोंडपिपरी तालुक्याची मदार शेतीवर अवलंबून आहे. शेतीचे कामे अंतिम टप्प्यात आल्याने उन्हाळ्याच्या दिवसात अनेकांच्या हाती काम नसते. असा वेळी तेंदु पत्ता युनिट सुरू करण्यात आल्याने नागरिकाच्या हाताला काम मिळनार आहे. तेंदु संकलनातून कमी दिवसात जादा रक्कम मिळत असल्याने अनेक कुटुंबाचे हात या कामात गुंतले असल्याचे दिसून येते. विशेषता: मे महिन्यात सुरू होणारे तेंदु पत्ता संकलन परिसरातील हजारो नागरिकांना वरदानच ठरत. हे विशेष..!
मे महिन्यात तेंदू संकलनाचे काम मोठ्या प्रमाणावर सुरू असते. यंदा टेंडर झाले नसल्याने आम्ही नाराज होतो. मात्र आता लिलाव झाल्याचे समजल्याने आनंद झाला आहे. संकलनासाठी लागणारे धागेही आम्ही तयार ठेवले आहेत. आता फक्त संकलन सुरू होण्याची प्रतीक्षा आहे.
— बालाजी वासेकर, तेंदू संकलन मजूर
