वरोरा :- शेगाव पोलीस स्टेशन हद्दीतील भद्रावती तालुक्यातील आष्टा परिसरात तलाव खोलीकरणाच्या कामादरम्यान निष्काळजीपणातून घडलेल्या दुर्दैवी अपघातात एका तरुणाचा जागीच मृत्यू झाला. ही घटना रविवारी (दि. २६ एप्रिल) सायंकाळी सुमारे ४.३० वाजताच्या सुमारास घडली असून परिसरात हळहळ व्यक्त केली जात आहे.
मिळालेल्या माहितीनुसार, आष्टा येथे तलाव खोलीकरणातून निघालेली माती शेतात टाकण्याचे काम सुरू होते. यावेळी एक ट्रॅक्टर पलटी झाल्याने तो सरळ करण्यासाठी दुसऱ्या ट्रॅक्टरच्या सहाय्याने ११ एमएम लोखंडी सळाखीने टोचन लावण्यात आले. मात्र, अधिक दाब आल्याने ही सलाख अचानक उभी झाली आणि वरून गेलेल्या जिवंत विद्युत तारेस स्पर्श झाला.
या घटनेत विद्युत प्रवाहाचा तीव्र धक्का बसल्याने अक्षय शामदेव कापटे (वय २६, रा. आष्टा वडाळा, ता. भद्रावती) यांचा जागीच मृत्यू झाला. अचानक घडलेल्या या घटनेमुळे कामगारांमध्ये घबराट पसरली असून गावात शोककळा पसरली आहे.
घटनेची माहिती मिळताच स्थानिक नागरिकांनी तत्काळ धाव घेतली. मृतदेह शवविच्छेदनासाठी वरोरा येथील उपजिल्हा रुग्णालयात पाठविण्यात आला आहे. या प्रकरणी पुढील तपास शेगाव पोलीस करीत आहेत.
दरम्यान, अशा प्रकारच्या कामांदरम्यान सुरक्षेच्या उपाययोजना काटेकोरपणे राबविण्याची गरज पुन्हा अधोरेखित झाली आहे.
