धामणगाव प्रतिनिधी : धामणगाव तालुक्यातील ढाकुलगाव गावाजवळील कॅनॉलमध्ये एका व्यक्तीचा मृतदेह आढळून आल्याची घटना आज उघडकीस आली. या घटनेमुळे परिसरात एकच खळबळ उडाली असून नागरिकांमध्ये भीतीचे वातावरण निर्माण झाले आहे.
मिळालेल्या माहितीनुसार, ढाकुलगाव परिसरातील कॅनॉलमध्ये एका व्यक्तीचा मृतदेह पाण्यावर तरंगताना काही नागरिकांच्या निदर्शनास आला. त्यांनी तात्काळ दत्तापुर पोलिसांना याची माहिती दिली. माहिती मिळताच दत्तापुर पोलीस घटनास्थळी दाखल झाले व स्थानिकांच्या मदतीने मृतदेह कॅनॉलमधून बाहेर काढण्यात आला.
पोलिसांनी केलेल्या तपासात मृत व्यक्तीची ओळख धीरज महात्रे (वय ३८, रा. ढाकुलगाव) अशी पटली. घटनेची माहिती मिळताच मृतकाचे नातेवाईक घटनास्थळी पोहोचले असून त्यांच्या आक्रोशाने वातावरण हळहळून गेले.
दरम्यान, पोलिसांनी मृतदेह ताब्यात घेऊन पुढील तपास सुरू केला आहे. मृत्यूचे नेमके कारण शवविच्छेदन अहवाल आल्यानंतरच स्पष्ट होणार असल्याची माहिती पोलिसांनी दिली आहे.
