नागपूर (वैभव शहाणे ) : लोकप्रतिनिधी हा केवळ विकासकामांचा शिल्पकार नसून संकटाच्या काळात जनतेच्या मदतीला धावून जाणारा आधारवडही असतो, याचा प्रत्यय रविवार (दि. ७ जून) रोजी आला. नागपूरहून काटोलकडे दौऱ्यावर जात असताना मार्गात झालेल्या अपघातातील जखमी महिलेच्या मदतीसाठी आमदार सुधाकर अडबाले यांनी दाखविलेली तत्परता आणि संवेदनशीलता नागरिकांच्या कौतुकाचा विषय ठरली.
नागपूर-काटोल मार्गावर एका दुर्दैवी अपघातात सौ. वनिता कुणाल मोहरिया या जखमी झाल्याचे आमदार अडबाले यांच्या निदर्शनास आले. घटनेचे गांभीर्य लक्षात घेत त्यांनी क्षणाचाही विलंब न करता आपला ताफा थांबवून घटनास्थळी धाव घेतली. जखमी महिलेची प्रकृती पाहून तिला तातडीने वैद्यकीय मदत मिळावी यासाठी त्यांनी स्वतः पुढाकार घेतला.
रुग्णवाहिकेची वाट पाहण्यात वेळ न घालवता आमदार अडबाले यांनी जखमी महिलेला स्वतःच्या वाहनातून काटोल येथील रुग्णालयात दाखल केले. तेथे वैद्यकीय अधिकारी डॉ. राजेश खोब्रागडे यांच्याशी संपर्क साधून तात्काळ उपचार सुरू करण्याच्या सूचना दिल्या. प्राथमिक उपचारानंतर अधिक चांगल्या वैद्यकीय सुविधांसाठी संबंधित महिलेला नागपूर येथे रेफर करण्यात आले.
अपघाताच्या प्रसंगी अनेकजण केवळ बघ्याची भूमिका घेत असताना आमदार अडबाले यांनी दाखविलेली संवेदनशीलता आणि तत्परता ही खऱ्या अर्थाने लोकसेवेची भावना अधोरेखित करणारी ठरली. त्यांच्या या कृतीमुळे जखमी महिलेला वेळेत उपचार मिळाले असून तिच्या कुटुंबीयांनाही मोठा दिलासा मिळाला.
सामान्य नागरिकांच्या सुख-दुःखात सहभागी होणे, संकटसमयी मदतीचा हात पुढे करणे आणि प्रशासनाला तत्काळ कामाला लावणे, ही लोकप्रतिनिधीची खरी ओळख असल्याचे आमदार अडबाले यांनी आपल्या कृतीतून पुन्हा एकदा सिद्ध केले. त्यांच्या या मानवतावादी भूमिकेचे परिसरातील नागरिकांकडून तसेच सामाजिक क्षेत्रातील मान्यवरांकडून कौतुक करण्यात येत आहे.
यावेळी विदर्भ माध्यमिक शिक्षक संघाचे नागपूर जिल्हा कार्यवाह संजय वारकर तसेच नीलेश खोरगडे उपस्थित होते.
कृतीतून जपली लोकसेवेची परंपरा
अपघातग्रस्त व्यक्तीला वेळेत उपचार मिळणे हे जीव वाचविण्यासाठी अत्यंत महत्त्वाचे असते. आमदार सुधाकर अडबाले यांनी दाखविलेल्या तत्परतेमुळे जखमी महिलेला त्वरित उपचार मिळाले. संकटाच्या प्रसंगी धावून जाणारी ही भूमिका लोकप्रतिनिधी म्हणून त्यांच्या संवेदनशील कार्यपद्धतीची साक्ष देणारी ठरली.
