कंपनीच्या गेटवर दोन गटांमध्ये हाणामारी; चार जणांना अटक
शिरूर प्रतिनिधी – रमेश बनसोडे
खेड तालुक्यातील हुंदाई कंपनीच्या गेटवर दोन गटांमध्ये जोरदार हाणामारी झाल्याची घटना घडली. लाठ्या-काठ्या, लोखंडी रॉड आणि इतर साहित्याने झालेल्या या मारहाणीत दोघे गंभीर जखमी झाले असून, एकजण आयसीयूमध्ये उपचार घेत आहे. या घटनेनंतर पोलिसांनी तात्काळ कारवाई करत चार जणांना अटक केली आहे.
काय आहे प्रकरण?
स्थानिक व्यवसायिक गटांमध्ये कंत्राटावरून वाद निर्माण झाला होता. कैलास तांबे आणि अजित तांबे यांचे कंपनीशी व्यावसायिक संबंध आहेत. 28 फेब्रुवारी रोजी अजित तांबे पाण्याचे जार पुरवण्यासाठी कंपनीत आला असता, दुर्गेश गाडे, अभि उर्फ बिडया बोऱ्हाडे, शुभम मोदगेकर आणि त्यांच्या साथीदारांनी त्याला धमकावत मारहाण केली. हा वाद कंपनीच्या गेटबाहेर सुरू झाला आणि गेटच्या आतपर्यंत पोहोचला.
मारहाणीचा व्हिडीओ व्हायरल
या घटनेचा व्हिडीओ सोशल मीडियावर व्हायरल झाला असून, यात आरोपींनी हातात लाठ्या, काठ्या आणि लोखंडी रॉड घेऊन केलेल्या हल्ल्याचे दृश्य दिसून येत आहे. या मारहाणीत कैलास तांबे गंभीर जखमी झाला असून, त्याचे तोंडाचे हाड फ्रॅक्चर झाले आहे. सध्या तो आयसीयूमध्ये उपचार घेत आहे.
पोलिसांची तात्काळ कारवाई
प्रवीण हुलगे यांच्या तक्रारीवरून खेड पोलिसांनी गुन्हा दाखल करत चौघांना अटक केली आहे. दरम्यान, दुसऱ्या गटानेही प्रत्युत्तरात गुन्हा नोंदवला आहे. उर्वरित आरोपींचा शोध सुरू असून, पोलीस या प्रकरणाचा सखोल तपास करत आहेत.
