कुरखेडा : हिंदवी स्वराज्याचे संस्थापक छत्रपती शिवाजी महाराज यांच्या जयंतीनिमित्त शिवभक्त परिवाराच्या वतीने कुरखेडा येथे तीन दिवसीय शिवजन्मोत्सव सोहळ्याचे आयोजन करण्यात आले. विविध स्पर्धा, मिरवणुका, संगीत व सांस्कृतिक कार्यक्रमांनी संपूर्ण शहर शिवमय झाले होते.
तीन दिवसांचे विविध कार्यक्रम
१८ फेब्रुवारी
पहिल्या दिवशी बालगोपालांसाठी वेशभूषा आणि नृत्य स्पर्धा आयोजित करण्यात आली. या स्पर्धेत लहानग्यांनी शिवकालीन योद्धे, राजमाता जिजाऊ, मावळे, संत, वीरांगना यांच्या वेशभूषांमध्ये सहभाग घेतला. स्पर्धेतील प्रथम, द्वितीय आणि तृतीय क्रमांक विजेत्यांना सन्मानचिन्ह व पारितोषिक देण्यात आले, तसेच सहभागी प्रत्येक स्पर्धकाला प्रोत्साहनपर बक्षीस देण्यात आले.
१९ फेब्रुवारी
दुसऱ्या दिवशी सकाळपासून शाहिरी पोवाडे आणि शिवभक्तीपर गीतांच्या गजराने शहर शिवमय झाले. रांगोळी स्पर्धेचे आयोजन करण्यात आले होते, ज्यात अनेक स्पर्धकांनी भाग घेतला. सकाळी ९ वाजता भगव्या ध्वजाचे ध्वजारोहण व ध्वजवंदना झाली. यानंतर दिंडी व पालखी सोहळ्याची सुरुवात झाली. दुपारी छत्रपती शिवाजी महाराज राज्याभिषेक आरती व पाळणा सोहळा संपन्न झाला. सायंकाळी भव्य मिरवणूक व झांकी प्रदर्शन आयोजित करण्यात आले होते. मिरवणुकीत शिवाजी महाराज आणि अफझल खान भेटीचा देखावा विविध चौकांमध्ये सादर करण्यात आला.
२० फेब्रुवारी
तिसऱ्या दिवशी स्पर्धांचे बक्षीस वितरण करण्यात आले. सायंकाळी युवांगण म्युझिकल ग्रुप तर्फे शिवमय गीतांचा कार्यक्रम झाला. संपूर्ण कार्यक्रमानंतर महाप्रसादाचे आयोजन करण्यात आले होते.
या सोहळ्याच्या यशस्वी आयोजनासाठी शिवभक्त परिवाराच्या कार्यकर्त्यांनी परिश्रम घेतले. नागरिकांनीही मोठ्या संख्येने सहभाग घेऊन शिवजन्मोत्सव सोहळ्याला उत्स्फूर्त प्रतिसाद दिला.
