राहुरी प्रतिनिधी :(शहाजी दिघे )
राहुरी : सांगली जिल्ह्यातील कवठे – महांकाळ येथुन नाशिककडे जात असलेले महाराष्ट्र परिवहन महामंडळाच्या एसटी बसमधून संगमनेर येथील रोहिदास सावित्रा धात्रक (वय – ६५) हे प्रवास करत होते. प्रवासादरम्यान त्यांना ह्रदय विकाराचा त्रास होऊ लागला. त्यामुळे सह प्रवासी, बस चालक, वाहकाने दाखवलेल्या सतर्कतेमुळे आणि निमगावजाळी प्राथमिक आरोग्य केंद्रातील डॉक्टर आणि कर्मचाऱ्यांनी केलेल्या प्रयत्नांमुळे त्याचे प्राण वाचवण्यात यश आले आहे.याबाबत मिळालेली माहिती अशी की, संगमनेर येथील रहिवासी असलेले रोहिदास धात्रक हे नगर येथुन संगमनेर येथे जाण्यासाठी महामंडळाच्या बसमध्ये बसले होते. ही बस चिचंपुर फाट्याजवळ आली असता धात्रक यांना ह्रदयात तीव्र वेदना सुरू झाल्या आणि ते बेशुद्ध झाले. ही बाब बसमधील इतर प्रवाशांच्या लक्षात आल्यानंतर त्यांनी त्यांच्याकडे धाव घेऊन बसचे वाहक व चालक यांना यांची माहिती दिली. त्याचंवेळी एका दुकानदाराने त्यांना निमगावजाळी येथील सरकारी रुग्णालयात जाण्याचा सल्ला दिला. ही घटना गुरुवार दि. २३ जानेवारी रोजी सायंकाळी ५.३० वाजेच्या सुमारास घडली.घटनेचे गांभीर्य ओळखून बस चालकाने प्रसंगावधान राखत बस थेट प्राथमिक आरोग्य केंद्र निमगावजाळी येथे नेली. यावेळी रुग्णालयाचे वैद्यकीय अधिकारी डॉ. तय्यब तांबोळी यांनी रोहिदास धात्रक यांच्यावर तातडीचे उपचार सुरू केले. रुग्णालयात ईसीजीची सुविधा उपलब्ध असल्यामुळे रुग्णाचा ईसीजी काढून योग्य ते उपचार केल्यामुळे रुग्णांचे प्राण वाचण्यात यश आले. यावेळी आरोग्य निरीक्षक राहुल बागुल, आरोग्य सेवक प्रमोद साठे, आरोग्य सेविका अंजुम पठाण, सविता शिरसाठ यांनी विशेष परिश्रम घेतले.दरम्यान या घटनेची माहिती मिळताच धात्रक यांच्या नातेवाईकानी निमगावजाळी आरोग्य केंद्राचे डॉक्टर, कर्मचारी, बसचे चालक, वाहक आणि प्रवाशाचे आभार मानले आहेत. तर परीसरातुन देखील सर्वांचे कौतुक होत आहे.बस थेट रुग्णालयाच्या प्रांगणात आल्यामुळे माझ्यासह सर्व कर्मचाऱ्यांनी तात्काळ तिकडे धाव घेतली. बसमधील बेशुद्ध व्यक्तीला प्रवाशाच्या सहकार्याने उपचारासाठी आतमध्ये नेले. उपचारादरम्यान तब्बल तासभर बस उभी असूनही कोणत्याही प्रवाशाने घाई अथवा गोंधळ न करता त्या व्यक्तीवर प्राथमिक उपचार करण्यासाठी सर्वोतोपरी सहकार्य केले. त्यामुळेचं त्या व्यक्तीचे प्राण वाचवण्यात यश आले आहे. अशी माहिती प्राथमिक आरोग्य केंद्र निमगावजाळीचे वैद्यकीय अधिकारी डॉ. तय्यब तांबोळी यांनी बोलताना दिली.
