वरोरा – तालुक्यातील पिंपळगाव (मारोती )येथील अक्षय दिगंबर निखुरे, मराठा ११ बटालियनमध्ये कार्यरत जवान, यांचा वाहन अपघातात मृत्यू झाला. गाडी खोल दरीत कोसळल्याने या दुर्घटनेत १८ जवानांपैकी पाचांचा मृत्यू झाला आहे. मृतक जवानाच्या वडिलांना ही दुर्दैवी बातमी वर्ध्याहून रजेवर आलेल्या एका सहकाऱ्याने दिली.
अक्षय यांनी बी.ए. फायनलचे शिक्षण घेत असताना २१ व्या वर्षी भारतीय सैन्यात २०१८ साली प्रवेश केला. अल्पभूधारक शेतकरी असलेल्या त्यांचे वडील व आई चार एकर शेती करतात. अशा प्रतिकूल परिस्थितीत आपल्या दोन्ही मुलांना देशसेवेसाठी पाठवणाऱ्या या आई-वडिलांबद्दल परिसरात आदर व्यक्त केला जात आहे.
अपघाती मृत्यूने पिंपळगाव परिसरावर दुःखाचा डोंगर कोसळला आहे. मृतक जवानाच्या पश्चात त्यांचे वडील, आई आणि भारतीय सैन्यात कार्यरत एक भाऊ असा परिवार आहे. उद्या मृतक जवानांचे शासकीय इतमामात स्वगावी अंतिम संस्कार होणार आहेत.
जवानांच्या कुटुंबाने हलाखीच्या परिस्थितीतही देशसेवा करणाऱ्या दोन्ही मुलांना सैन्यात पाठवले होते. त्यांच्या बलिदानामुळे परिसरातील लोक कृतज्ञता व्यक्त करत असून, शोकसंतप्त वातावरण आहे.
