बिडकीन (अलीम शेख, प्रतिनिधी पैठण): चितेगाव एमआयडीसीतील आर.एल. स्टील कंपनीमध्ये अपघातात मृत्यू पावलेल्या कामगारास नुकसानभरपाई देण्यास कंपनीने टाळाटाळ केल्याचा आरोप मृत कामगाराच्या कुटुंबीयांनी केला आहे.
चितेगाव एमआयडीसीमधील आर.एल. स्टील कंपनीत ठेकेदारामार्फत 20 वर्षांपासून वाहनचालक म्हणून काम करणारे किरण अब्दुल जावक अली शेख (वय 59) यांचा 29 डिसेंबर 2023 रोजी अपघात झाला. कामावर असताना झालेल्या अपघातात गंभीर जखमी झाल्याने त्यांना उपचारासाठी छत्रपती संभाजीनगर येथे नेण्यात आले. खाजगी रुग्णालयाने पुढील उपचारासाठी घाटी रुग्णालयात पाठवले, मात्र वैद्यकीय अधिकाऱ्यांनी त्यांना मृत घोषित केले.
मृत कामगाराच्या पत्नी रुक्साना अब्दुल शेख (वय 55) यांच्यासह कुटुंबीयांनी नुकसानभरपाईसाठी वारंवार कंपनीशी संपर्क साधला, मात्र कंपनीने दुर्लक्ष केले. एक वर्ष उलटूनही कंपनीने कोणतीही आर्थिक मदत किंवा नुकसानभरपाई दिली नाही, असे रुक्साना शेख यांनी सांगितले.
कुटुंबाची आर्थिक परिस्थिती अत्यंत नाजूक:
मृत कामगाराच्या कुटुंबीयांवर उपासमारीची वेळ आली असून ते रोजगाराच्या शोधात आहेत. कंपनीकडून मदतीची अपेक्षा फोल ठरल्याने त्यांनी संबंधित विभागाकडे तक्रार दाखल करण्याचा निर्णय घेतला आहे.
3 डिसेंबर रोजी मयताच्या कुटुंबीयांनी आर.एल. स्टील कंपनीच्या गेटसमोर बसून आपली मागणी मांडली. नुकसानभरपाई मिळाली नाही तर कंपनीविरोधात कठोर कारवाईसाठी प्रयत्न करू, असा इशारा त्यांनी दिला आहे.
संबंधित विभागाची भूमिका महत्त्वाची:
कुटुंबीयांनी दिलेल्या माहितीनुसार, कंपनीच्या या वागणुकीमुळे प्रशासन आणि संबंधित विभागांनी हस्तक्षेप करणे अत्यावश्यक आहे. कंपनीकडून नुकसानभरपाई लवकरात लवकर मिळावी, अशी कुटुंबीयांची मागणी आहे.
